Քոչարյանի մոռացկոտ «խոսափողը»

ԱԻՄ առաջնորդ Պարույր Հայրիկյանը, փաստորեն, շատ կարճ հիշողություն ունի․ նա մոռացել է Ռոբերտ Քոչարյանի հետ անցկացրած աշխատանքային տարիների և 2-րդ նախագահին մատուցած ծառայությունների մասին և այսօր՝ «եզն ընկավ, դանակավորները շատացան» տրամաբանությամբ, «քարեր է գլորում» և անգամ ակնարկում, որ Ռոբերտ Քոչարյանի բացասական քաղաքական կերպարի մասին իմացել է դեռ տարիներ առաջ։ 

Այստեղ տեղին է թարմացնել Պարույր Հայրիկյանի հիշողությունն առ այն, որ ինքը եղել է Ռոբերտ Քոչարյանի՝ Մարդու իրավունքների հարցերի հանձնաժողովի նախագահ և մշտապես, երբ խոսել է, իր բերանով խոսել է հենց նույն 2-րդ նախագահը։
«Լևոն Տեր-Պետրոսյանը բերեց Ռոբերտ Քոչարյանին, որովհետև մտածում էր պաշտպանված լինելու մասին։ Քոչարյանը Լևոնի բերած մարդն էր, բայց պետք է նման պաշտոնյային հեռացներ, հետևաբար, իրենք նույն ոչ բարեկիրթ և ոչ քաղաքակիրթ ուժերի ներկայացուցիչներն էին»,-այսօր լրագրողների հետ զրույցում ասաց ԱԻՄ առաջնորդը՝ մոռանալով վերը նշված կարևոր դրվագների մասին։

Բարոյական նորմերը, գոնե, պետք Պարույր Հայրիկյանին հիշեցնենին, որ 1998-1999 թթ. Քոչարյանի խորհրդականն էր և Սահմանադրական բարեփոխումների հանձնաժողովի նախագահ, հետևաբար, պետք է հարգել անմեղության կանխավարկածն ու Ռ․ Քոչարյանի տված բարիքներից օգտված որոշ քաղաքական գործիչների նման ջայլամի կեցվածք ընդունել և սպասել։

Այդպես, թերևս, Պարույր Հայրիկյանը չէր արժանանա այն լուտանքների հսկա չափաբաժնին, որին արժանացավ այսօրվա անկեղծությունից հետո․․․

NEWSPRESS.am