Կոտայքի նորանշանակ մարզպետը պետական բյուջեով սեփական տուն է կառուցում. սրա համա՞ր է սահմանափակվում ազատ խոսքը

«Իմ թիվ մեկ առաջնահերթությունը Կոտայքի մարզում լինելու է Կոտայքի մարզի բնակչի վերափոխումը ՀՀ քաղաքացու. ամեն ինչ լինելու է օրենքներով ինձ վերապահված լիազորությունների ու պարտավորությունների շրջանակներում»:

Այս հայտարարությունը Կոտայքի մարզպետ Ռոմանոս Պետրոսյանն արեց իր նշանակումից անմիջապես հետո՝ լրագրողների հետ ունեցած հարցազրույցի ժամանակ: 

Դրանից շատ չանցած՝ մամուլում սկսեցին շրջանառվել լուրեր, որ մարզպետ Ռոմանոս Պետրոսյանը գյուղապետերին «չորով» հրահանգում է հրաժարվել պաշտոններից: Մասնավորապես, նշվում էին ՀՀԿ-ական ու ԲՀԿ-ական գյուղապետերի անուններ: Հաշվի առնելով, որ վարչապետ Նիկոլ Փաշինյանը հայտարարել էր, թե վենդետա չի լինելու՝ մարզպետը սպառնացել է գյուղապետերին, թե ոչ մի տեղ չխոսեն այն մասին, որ ինքն է ստիպում ազատվել աշխատանքից, այլապես, իրենց համար կարող է վատ լինել:

Հատկապես հեղափոխությունից հետո նշանակված պաշտոնյայի համար այս անվայելուչ պահվածքը մարսելուց հետո, Պետրոսյանն այժմ էլ որոշել է ձեռքը գցել ուր պատահի՝ համեղ պատառներ պոկելու համար: Աստիճանաբար նրա ախորժակը մեծացել է ու որոշել է դիզել իր տակը։

Համենայն դեպս, այդ մասին են վկայում NEWSPRESS.am-ին հնչեցրած ահազանգերը: Մի շարք քաղաքացիներ դժգոհում են մարզպետի պահվածքից:

Մեզ հասած տեղեկությունների համաձայն՝ Ռոմանոս Պետրոսյանը վատնում է պետական բյուջեն, այսինքն՝ այն գումարները, որոնք պետությունից հատկացվել է մարզին՝ առաջնահերթ խնդիրները լուծելու համար:

Ասում են, որ դեռ նոր պաշտոն ստացած մարզպետը, մարզում առկա բազում խնդիրները լուծելու փոխարեն,  մեծ թափով տուն է կառուցում իր համար: Մեզ ահազանգող քաղաքացիները NEWSPRESS.am-ին են տրամադրել առանձնատան նկարներից, որոնք հաջողվել է նրանց լուսանկարել, սակայն խնդրել են չբացահայտել իրենց ինքնությունը:

Քաղաքացիների խոսքով՝ շինարարական աշխատանքները շատ արագ են առաջ ընթանում: Հավանաբար, մարզպետն արդեն զգում է իր տակ երերացող հողը, որը դեռ չէր ամրացել:

Այս ֆոնին՝ վատ չէր լինի, եթե վարչապետն ուշադրություն դարձներ իր նշանակած կադրերի կատարած աշխատանքների վրա, հատկապես երբ նրանք մեկը մյուսի հետևից իրենց անհեթեթ հայտարարություններով կամ քայլերով, մեղմ ասած, «քաշում» են իրեն: Արդեն իսկ ազատման դիմում գրած «նորանշանակ» պաշտոնյաները վկա:

Մյուս կողմից էլ՝ չի բացառվում, որ հենց Ռոմանոս Պետրոսյանի ու մյուսների թերացումները հաշվի առնելով է Նիկոլ Փաշինյանը սահմանափակումներ դնում ազատ խոսքի ու տեղեկատվության վրա. նա, ով համարձակվի խոսել նորանշանակ պաշտոնյաների առանաձնատներ կառուցելու, նրանց կողմից բյուջե վատնելու, սխալ աշխատելու կամ պարզապես ոչինչ չանելու մասին՝ ԱԱԾ-ն նրան այցի կգնա...