Ազատ խոսքի համար սպառնում եք ԱԱԾ-ով, իսկ ո՞վ պետք է ԱԱԾ-ին վերահսկի՝ Մանվելի լուսանկարը հրապարակելու համար

Միջազգային խոշորագույն երկու լրատվական կազմակերպությունների՝ SEEMO-ի և IPI-ի խորհուրդների անդամ, NEWSPRESS.am-ի հիմնադիր-տնօրեն Արիանա (Արմենուհի) Հովսեփյանը, ֆեյսբուքյան իր էջում գրել է.

«Հանկարծ չթվա, թե ես պաշտպանում եմ Մանվել Գրիգորյանին, բայց, ինչպես Արիստոտելն էր ասում՝ «Պլատոնն իմ բարեկամն է, բայց ճշմարտությունն ավելի թանկ է»: Ես եմ, որ համարձակություն եմ ունեցել Մանվել Գրիգորյանին երկու տարի շարունակ քննադատելու, այն Մանվել Գրիգորյանին, որը նախկին իշխանության կողմից ամենաբարձր մակադակով էր հովանավորվում:

Սակայն...

Մանվել Գրիգորյանի՝ ԱԱԾ մեկուսարանից արված լուսանկարի հրապարակումը ներկայիս իշխանության տեսակի մասին շատ բան է ասում: Հակված չեմ այն տեսակետին, թե դա պարզապես «լրագրողական գայթակղություն էր», կամ ինչ-որ շարքային համարձակվել էր նկարել և այն տրամադրել հենց վարչապետի ընտանիքի լրատվամիջոցին, այսինքն՝ իրավական պետության պարագայում շարքայինը գիտակցաբար իր աշխատանքը դնում էր կասկածի տակ:

Իսկ, եթե ամենը «լրագրողական գայթակղություն էր», ապա հետևություն՝ Նիկոլ Փաշինյանը չի տիրապետում իրավիճակին: Նրա կառավարման ժամանակ է, որ ԱԱԾ մեկուսարանից լուսանկար է դուրս գալիս և նրա կառավարման ժամանակ է, որ հենց իրեն պատկանող լրատվամիջոցը հրապարակում է անօրինական կերպով ձեռք բերված լուսանկարը:

Հիմա հարց՝ Նիկոլ Փաշինյանը կպատժի՞ իր կնոջ կայքին, թե՞ նրա խորհուրդները՝ խոսելուց առաջ մտածել սովորելու մասին, միայն «այլախոհներին» էր ուղղված:

Դուք ուզում եք սահմանափակել խոսքի ազատությունը և վախեցնում եք, որ ԱԱԾ-ն կգնա այլախոհների հետևից, բայց նույն ձեր ԱԱԾ աշխատակիցները լուսանկար են դուրս հանում: Ի դեպ, հանրությունը շատ կցանկանար տեղեկանալ, թե ով էր այդ լուսանկարի հեղինակը:

Խելքներդ գլուխներդ հավաքեք և կատակ չանեք ժողովրդի հետ: Այդ ժողովուրդն ինչպես ձեզ բերել է իշխանության, այնպես էլ կհեռացնի իշխանությունից: Միանգամից «զարգացածները» պետությունը կրծողներ են»: