Գործարարի մահափորձի մեջ մեղադրում են պատգամավոր Աշոտ Արսենյանին. վարչապետը լուռ է, իսկ Պետերբուրգի հայ համայնքի ղեկավարը փորձում է քողարկել (տեսանյութ)
Հուլիսի 27-ին՝ Սանկտ Պետերբուրգ կատարած այցի ժամանակ, վարչապետ Նիկոլ Փաշինյանը ծանոթացավ հայ գործարարներից մեկի հետ, ով պատրաստակամություն հայտնեց 3 միլիարդ ներդրում կատարել Հայաստանում: Իսկ ավելի կոնկրետ՝ հայ գործարար Մուրադ Մուրադյանին ներկայացրեց հայ համայնքի ղեկավար Կարեն Մկրտչյանը: Նա վառ գույներով ու դրական բոլոր որակումներով պատմեց, թե ինչ լավ մարդ ու գործարար է իր «ընկեր Մուրադը», հետո խոսքը փոխանցեց նրան. «Մուրադ ջան, դու ասա...»: Մուրադյանն էլ սկսեց պատմել, որ 20 տարի հալածվել է ՀՀ իշխանության կողմից, որ հայրենիքում իր բիզնեսը ձեռքից խլել են, մահափորձ են կատարել իր նկատմամբ և որ ինքը պարզապես հազիվ է գլուխն ազատել՝ հալածանքների չենթարկվելու համար: Նա նշեց նաև, որ այսքան ժամանակ սպասել է, թե երբ է երկրում իշխանությունը տապալվելու: Ու հիմա, երբ այն տապալվեց, պատրաստ է վերադառնալ ու ներդրում կատարել, եթե Փաշինյանն իրեն այդ հնարավորությունը տա:
Փաշինյանն, իհարկե, խոստացավ պարզել, թե ինչո՞ւ է հայ գործարարը հետախուզման մեջ՝ սեփական երկրում: Պարզեց, թե ոչ, այդպես էլ այդ մասին չհրապարակվեց, բայց գործարարին հրավիրեց Հայաստան, իսկ դրանից մի քանի օր անց, Մուրադ Մուրադյանը վերադարձավ Պետերբուրգ և ձերբակալվեց:
Թե ինչ տեղի ունեցավ Հայաստանում, ու թե ինչո՞ւ Հայաստան կատարած այցելությունը «ողբերգական» ավարտ ունեցավ Մուրադյանի համար, թերևս կիմանա ինքը՝ Մուրադյանը, հնարավոր է նաև Փաշինյանն ու, իհարկե, իրավապահները, ում Փաշինյանը հանձնարարել էր փորփրել Մուրադյանի անցյալը և ջրի երես հանել իրականությունը:
Ասում են՝ Վայոց ձորի Գետափ գյուղի բնակիչ Մուրադ Մուրադյանը ներգրավված է եղել տարբեր խարդախությունների մեջ.
Ասում են՝ Մուրադ Մուրադյանը մարդկային իր տեսակով և հանցավոր գործելաոճով ներգրավված լինելով տարատեսակ քրեական պատմությունների մեջ՝ Սանկտ Պետերբուրգում ենթարկվել է հարձակման, որի համար իրավապահ մարմինների կողմից հարուցված քրեական գործով կատարված քննությամբ բացահայտվել են նրա սպանության պատվիրատուները:
Ասում են՝ Մուրադ Մուրադյանի նկատմամբ 2003 թվականին մահափորձ է կատարել նաև ՀՀ ԱԺ պատգամավոր Աշոտ Արսենյանը (վերջինս արձագանքել է այս մեղադրանքին՝ հայտարարությամբ)...
Մի խոսքով՝ թե ով է ում նկատմամբ մահափորձ իրականացրել, ով է իրականում ավելի հանցագործ ու խարդախ և, թե ինչու են կալանավորել Մուրադ Մուրադյանին, կպարզվի արդեն սկսված նախաքննությունից հետո:
Այստեղ այլ հարց է առաջ գալիս. միթե՞ Նիկոլ Փաշինյանի կամ հենց Պետերբուրգի հայկական համայնքի ղեկավարի Մկրտչյանի համար այս ամենը հայտնություն էր և նոր պետք է պարզեին, թե ինչո՞ւ է 20 տարի Մուրադյանը հետախուզման կամ հետապնդման մեջ, և ինչո՞ւ է, ասենք, պատգամավոր Աշոտ Արսենյանը փորձել սպանել նրան:
NEWSPRESS.am-ի այս հարցադրումն անկեղծ զարմացրեց Կարեն Մկրտչյանին.
«Ինձ համար բացահայտում էր... ես չգիտեի, որ նման բաներ կան.. սպասենք հետաքննության արդյունքին՝ տեսնենք՝ ի՞նչ է եղել»,-ասաց Մկրտչյանը:
-Մի՞թե այդքան տարի լինելով Պետերբուրգի հայ համայնքի ներկայացուցիչ և հայտնի գործարար՝ երբեք Ձեզ չի հետաքրքրել, թե՞ ինչպես է Մուրադ Մուրադյանը հայտնվել այդ քաղաքում և ինչո՞ւ են հետապնդում նրան:
-Ինքը եկել է 1998 թվականին և ասում էր, որ իրեն հետապնդում են, որոշ բաների տեղյակ եմ, բայց կոնկրետ չգիտեմ՝ ինչի: Փաստաթղթեր է ցույց տվել, ասել, որ մեղավոր չէ, դե ես էլ հավատացել եմ՝ լսելով իրեն: Մենք այդքան մտերիմ չենք...
-Բայց վարչապետի մոտ նրա մասին խոսելիս ասացիք, որ Մուրադյանը Ձեր ընկերն է:
«Չէ,նա իմ ընկերը չէ... այսինքն՝ ասել եմ, որ ընկեր է, ինչ ասել՝ ասել եմ, բայց մարդն ինձ ասում է՝ 20 տարի հետապնդման մեջ է, անարդար վիճակի մեջ, ես էլ որոշեցի օգնել նրան ու ներկայացնել այդ մարդուն վարչապետին, որպեսզի նա լսի խնդիրը: Դա իմ լիազորությունների մեջ չէր, բայց ուզեցի օգնել, իմ առաքելությունը միայն ներկայացնելն էր։
-Վարչապետը հանձնարարեց ՀՀ պատկան մարմիններին անմիջապես պարզել, թե կոնկրետ ի՞նչ խնդրի համար է հետապնդման մեջ Մուրադյանը. Դո՞ւք արդեն տեղյակ եք, գիտե՞ք, թե ի՞նչ փուլում են այդ ուսումնասիրությունները, և ի՞նչ արդյունքներ կան:
-Չէ', չէ', չէ'... տեղյակ չեմ, տեղյակ չեմ. ես Մուրադին Հայաստանից վերադառնալուց հետո էլ չեմ տեսել. լսո՞ւմ եք ինձ. նա գնաց Հայաստան, հետո վերադարձավ, բայց ես նրան չեմ տեսել մինչև կալանավորումը:
-Մուրադ Մուրադյանի նկատմամբ մահափորձ է իրականացվել ո՛չ միայն Հայաստանում, այլև ձեզ մոտ՝ Պետերբուրգում, Ձեզ մտածելու տեղիք չի՞ տվել:
-Չէ դե, ի՞նչ պետք է մտածեինք: Լսել ենք, որ Սաքոյին են սպանել, շատ լավ խելոք տղա էր, ու ասում էին, որ ուզել են իրեն սպանել. էդքանը: Ես չգիտեմ՝ դա որքանո՞վ է ճիշտ. էքսպերտիզա պետք է լինի...։
-Պարո՛ն Մկրտչյան, փաստորեն Դուք վարչապետին ներկայացնելիս՝ Մուրադյանի մասին լրիվ դրական արտահայտվեցիք, իսկ այսօր Ձեր պատասխաններում կարծես հետքայլ է նկատվում: Դուք երաշխավորեցիք նրա համար. ինչպե՞ս կարող էիք երաշխավորել, երբ, ինչպես Դուք եք այսօր ներկայացնում, նրա մասին ոչինչ չգիտեիք:
-Ես հետ չեմ կանգնում իմ ներկայացնելու ձևից, բայց ես չեմ կարող երաշխավորել... իմ միսիան ես կատարել եմ՝ ներկայացրել եմ նրան, իմ գործը արել եմ, հիմա մնացածը թո՛ղ մասնագետներն անեն՝ տեսնեն, թե ինչ է տեղի ունեցել։
Կարեն Մկրչյանը նաև չի կարծում, թե այս ձերբակալությունը կապված էր գործարարի՝ Հայաստան կատարած այցելության հետ. «Հայաստանի հարցերը լուծվում են Հայաստանում, իսկ Ռուսաստանինը՝ Ռուսաստանում»,-ասաց Մկրտչյանը:
