Բանանային հանրապետության վարկանիշ ձեռք բերելուց պետք է զգուշանալ. քաղաքագետը զգուշացնում է՝ չկրկնել Աբրահամյանի կառավարության սխալը

Այս կառավարությունը չպետք է կրկնի այն սխալը, որ թույլ տվեց Հովիկ Աբրահամյանինը` կառավարության սպիտակ դահլիճում ընդունելով ոչ մոդել, ոչ էլ դերասանուհի, այլ ուղղակի ոչնչով և պոռնոտեսագրությամբ աչքի ընկած Քիմ Քարդաշյանին:
Եթե որևէ պաշտոնատար անձ ընդունելության արժանացնի քալիֆորնիացի այս պարոնին` ապա դա խայտառակություն կլինի: Այդ մասին ֆեյսբուքյան իր էջում գրառում է արել քաղաքագետ Հայկ Մարտիրոսյանը: Քաղաքագետի գրառման մեջ նաև ասվում է.

«Դեն Բիլզերյանն ԱՄՆ-ում կոկաինի բազմակի օգտագործումից սրտի բազմակի կաթված ստացած ծաղրածուի համարում ունի, իսկ նրա 25 մլն հետևորդների մի մեծ մասը անուղեղ նմանատիպներ են, մի մասն էլ` շոկային լուսանկարներով պարզապես հետաքրքրվածներ:

Հայաստանը ո´չ պոռնոաստղերով և ո´չ էլ խաղամոլ, սեքսամոլ ու զինամոլ թմրամոլներով հայտնի դառնալու կարիք ունեցող երկիր է: Դա մեծացնում է ճանաչելիությունը մի քանի միլիոն անուղեղ և որևէ բանի անպիտան զանգվածի մոտ, բայց վարկաբեկում օտար հասարակությունների ավելի լայն շերտերի աչքում: Բանանային հանրապետության վարկանիշ ձեռք բերելուց պետք է զգուշանալ, եթե անգամ դրա գինը մի քանի հավելյալ տուրիստի հնարավոր այցելությունն է:

ՀՀ քաղաքացիությունն էլ չպետք է դառնա Սերժ Սարգսյանի աջ ու ձախ բաշխվող մեդալների պես արժեզուրկ մի բան: Քաղաքացիություն կարելի է և հաճախ պետք է շնորհել կա´մ դրա պահանջներին համապատասխանելու, կա´մ էլ Հայաստանին կամ հայերին մատուցած բացառիկ և արժեքավոր ծառայությունների համար:

Մեկը, որ ոչինչ չի արել, լեգալացված ցածր բարոյականության քարոզիչ է և առաջին անգամ է Հայաստան ոտք դնում, հայության և Հայաստանի հետ բացարձակապես կապ չունի և միայն ազգանունն ու ծագումն են մասամբ հայկական` Հայաստանի քաղաքացիության բարձր պատվին այդպես հեշտորեն ուղղակի չպետք է արժանանա»: