ԿԳ նախարարը գլուխ չի հանում ո՛չ ազգից, ո՛չ էլ իր գործից․ Գեղարքունիքի մարզպետը հիմարացրե՞լ է նրան

ՀՀ կրթության և գիտության նախարար Արայիկ Հարությունյանը չգիտի, թե Պաշտպանության նախկին նախարար Վիգեն Սարգսյանն ինչ քննադատության է ենթարկել Երևանի քաղաքապետի թեկնածու Հայկ Մարությանին:

Նա «Վիգեն Սարգսյանի ստատուսները կարդալու ժամանակ չունի»: 

Արայիկ Հարությունյանը նաև շրջանցեց լրագրողների այն հարցը, թե ինչպե՞ս կմեկնաբանի ինքը Հայկ Մարությանի հայտարարությանը, թե ուժերը բաժանված են սևերի ու սպիտակների, և որ իրենց դեմ խաղ չկա:

«Ես էս ազգից գլուխ չեմ հանում։ Մի տեղ ասում են սև ու սպիտակ թող լինի, մի տեղ ասում են՝ սև ու սպիտակ չլինի»,- կատակեց Հարությունյանը՝ նկատի ունենալով դպրոցական համազգեստը:

Չենք քննարկում այն, որ Հայկ Մարությանի և կրթության նախարարի նշած «սև ու սպիտակները» տարբեր հասկացություններ են և իրար հետ ոչ մի կապ չունեն: Այս առումով կարելի է ասել, որ Արայիկ Հարությունյանի «կատակը» չստացված էր:

Մյուս կողմից էլ՝ նա իսկապես գլուխ չի հանում ոչ միայն ազգից, այլև հենց ինքն իրենից,  իր գործից ու իր նշանակած կադրերից: Եթե գլուխ հաներ, ապա կհասկանար, թե, օրինակ, ում է նշանակել Գեղարքունիքի տարածաշրջանային պետական քոլեջի տնօրեն:

Եթե իսկապես նախարարն այդ մասին չգիտի, ու նրան տեղյակ չեն պահել, ապա ի գիտություն նախարարի. իր ստորագրած փաստաթղթով քոլեջի տնօրեն է նշանակվել Գեղարքունիքի մարզպետի քրոջ ամուսինը՝ հանրապետական Գեղամ Խաչատրյանը:

NEWSPRESS.am-ի տեղեկություններով՝ Գեղամ Խաչատրյանը չի փայլում իր կրթությամբ, պարզապես պաշտոնը նրան «նվիրել է» իր աներձագը՝ նորանշանակ մարզպետ Իշխան Սաղաթելյանը։ Դա այն նույն Սաղաթելյանն է, ով մերկ ու հպարտ շրջում էր Սևանի ափին՝ քորելով կլոր փորը։

Իշխան Սաղաթելյանը Գեղարքունիքի մարզի Գեղամավան համայնքի ղեկավար Վաչիկ Սաղաթելյանի որդին է, ով ամրացնելով հողը իր ոտքի տակ՝ այժմ էլ հարազատներին է որոշել գործի տեր դարձնել, այս դեպքում՝ քրոջ ամուսնուն՝ Գեղամ Խաչատրյանին։ Վերջինս ժամանակին, ՀՀԿ-ին մատուցած իր ծառայությունների համար, արժանացել է նրա փաղաքշանքին ու ԿԳ նախկին նախարար Արմեն Աշոտյանի ձեռքով պատառ ստացել՝ ուսումնարանի տնօրենի պաշտոնի տեսքով։

Հիմա էլ նախկին «մոլի հանրապետականը», իր աներձագի շնորհիվ, ավելի բարձր պաշտոն է ստացել՝ նոր նախարար Արայիկ Հարությունյանի ձեռքով։

Ստացվում է՝ «փեսա-աներոդի» կա՛մ հիմարացրել են նախարարին, կա՛մ էլ նախարարն ինքը նպատակներ ունի ՀՀԿ-ական տնօրենի հետ՝ կապված գալիք ընտրությունների հետ։