Երբ մեծ «լոնքով» գնում է տապալման․ խայտառակության և խեղկատակության մեջտեղում

Երևանի ավագանու ընտրություններին ընդառաջ ակտիվացել են դրանց մասնակցող քաղաքական կուսակցություններն ու դաշինքները․ առաջինն ակտիվացման նշանները ցույց տվեց «Իմ քայլը» դաշինքի քաղաքապետի թեկնածու Հայկ Մարությանը։

Ավագանու ընտրությունների ֆինանսավորումն ապահովելու համար կազմակերպված դրամահավաքի ժամանակ քաղաքապետի դերասան թեկնածուն ասել է․ «Այսօր Հայաստանում իրավիճակը շատ պարզ է՝ կան սպիտակ ուժեր և սև ուժեր, վե՛րջ։ Ես ուզում եմ պաշտոնական հայտարարել, չնայած գիտեք, բայց պետք է ասեմ՝ այո՛, մենք սպիտակ ուժերն ենք, իսկ բոլոր նրանք, ովքեր չեն ուզում, որ մենք հաջողություն ունենանք, ես կարող եմ ասել, որ սև ուժերն են»:

Սա Հայկ Մարությանի առաջին սայթաքումը չէր, սակայն նախորդների համեմատ խայտառակ էր, ինչին շտապեց արձագանքել ընդդիմադիր Վիգեն Սարգսյանը՝ հասարակությանը սևերի և սպիտակների բաժանած Մարությանին անվանելով «բիգուդիավոր տղամարդ»։ 

Ու որքան էլ Վիգեն Սարգսյանին շտապեց հակադարել հեղհեղուկ և քաղաքական հորիզոնում իր տեղը չգտնող Ալեն Սիմոնյանը, միևնույնն է, հասարակության ադեկվատ հատվածը չի կարող մարսել և հասկանալ Հայկ Մարությանին։

Հետաքրքրականն այն է, որ Մարությանն ավելի ուշ ոչ թե ներողություն խնդրեց նման մեծ «լոնքով» դեպի տապալում գնալու համար, այլ ավելին՝ շտապեց գործի գցել իր թիմակիցերի կողմից փորձված հայտնի մեթոդը՝ օգտագործել ժողովրդին և խոսել ժողովրդի անունից, թեև, հանուն արդարության՝ պետք է ասել, որ կարող է խոսել միայն ժողովրդի մի հատվածի, ոչ թե ամբողջի անունից։ 

«Այսօր համացանցում քննարկման առարկա են դարձել ելույթումս հնչեցված որոշ ձևակերպումներ, որոնք տարաբնույթ մեկնաբանությունների առիթ են հանդիսացել։
Ուզում եմ հստակ ֆիքսել, որ Հայաստանում կա ընդամենը մեկ սուբյեկտ, որի դեմ խաղ չկա, և դա Հայաստանի ժողովուրդն է։

Ու, այո՛, բոլոր այն ուժերը, որոնք տարիներ շարունակ բռնացել են ու դեռ փորձելու են բռնանալ ժողովրդի ազատության և արժանապատվության վրա, խաբել ժողովրդին, կանխել վերջինիս առաջընթացն ու հաջողությունը, սև ուժեր են, և ես անձամբ իմ պարտքն եմ համարել և համարում անել ամեն ինչ, որպեսզի նրանք այլևս երբեք չկարողանան դա անել։ Ընտրությունը ժողովրդինն է, և ես համոզված եմ, որ մեր թիմը կարժանանա վերջինիս վստահությանը»,-իր քաղաքական անփորձությունն է հիմնավորել Մարությանը՝ ևս մեկ անգամ ապացուցելով, որ ֆեյսբուքը միակ հարթակն է, որտեղ նորեկ իշխանավորներն ու նրանց հարող կուսակցականները իրենց զգում են ինչպես ձուկը ջրում։

Հենց նման խեղկատակություններից և խայտառակություններից զերծ մնալու համար էր, որ հասարակության ոչ «նիկոլաման» և ադեկվատ հատվածը կոչ էր անում գրագետ և ճիշտ կադրային քաղաքականություն վարել, քանի որ երկիր կառավարելն, իսկ այս դեպքում քաղաք ղեկավարելը, խաղ ու պար չէ, ինչը շարունակում է անընկալելի մնալ հեղափոխական իշխանավորների համար։ 

Եվ սա դեռ առաջին ծիծեռնակն է․․․

NEWSPRESS.am