Կկարողանա՞ Փաշինյանը Պուտինի ականջին այնպես շշնջալ, որ Լավրովը 3-րդ անգամ չզգուշացնի

Ռուսաստանի արտաքին գործերի նախարար Սերգեյ Լավրովը Մոսկվայի Արտաքին հարաբերությունների ինստիտուտում, ի թիվս այլ հարցերի, անդրադարձել է հայաստանյան իրադարձություններին և նշել, որ Մոսկվան մտահոգ է Հայաստանում ծավալված իրադարձությունների առթիվ․

«Իհա՛րկե, մեզ մտահոգում է այն հանգամանքը, որ իրադրությունը Հայաստանում շարունակում է թեժ մնալ, հետաքննվում են տասնամյա վաղեմության իրադարձությունները, գիտեք այդ փաստերի, տեղի ունեցած ձերբակալությունների մասին։ Անկասկած, մենք դա համարում ենք ՀՀ ներքին գործը և շատ ենք ցանկանում, որպեսզի այդ ներքին գործերը մնան օրենքի և Սահմանադրության ամուր հիմքի վրա ու արագորեն հաղթահարվեն»,-ասել է Լավրովը:

Հայաստանյան իրադարձությունների վերաբերյալ սա Սերգեյ Լավրովի ոչ առաջին մտահոգությունն է. ավելի վաղ գերտերության ԱԳ ղեկավարը նշել էր, որ Հայաստանում տեղի ունեցող իրադարձությունները հակասում են երկրի նոր ղեկավարների հայտարարություններին այն մասին, որ հրաժարվելու են իրենց նախորդների նկատմամբ քաղաքական հետապնդումներից։

Ըստ էության, Սերգել Լավրովն ահազանգում է, որ հայ-ռուսական հարաբերություններում ինչ-որ բան այն չէ և ակնարկում է «թավշյա իշխանություններին»՝ քայլեր ձեռնարկելիս լինել առավել զգույշ։ 

Այն, որ հայ-ռուսական հարաբերություններում ինչ-որ բան սկսել է այն չլինել, բարձրաձայնում են նաև վարչապետն ու իր թիմը՝ ամեն պատեհ և անպատեհ առիթով կրկնելով, որ արտաքին քաղաքական վեկտորի փոփոխություններ չեն լինելու, և հիմա Փաշինյանը նույնը կասի նաև Մոսկվայում՝ Պուտինի հետ հանդիպման ժամանակ: Ասելը՝ կասի, բայց արդյո՞ք կարող է ներկայացնել փաստեր, որ այդ հարաբերությունները փոփոխություններ չեն կրել՝ դժվար է ասել։

Փաշինյանին դժվար օրեր են սպասվում, քանի որ Պուտինի հետ հանդիպումը հանդիպում չէ Հանրապետության հրապարակում հավաքված բազմության հետ, որոնց կարելի է հրապարակում պահել ականջահաճո հայտարարություններով։

Պուտինի հետ հանդիպումը հանդիպում է Միքայել Հարությունյանին արտահանձնելու մերժում ստանալուց, ՀԱՊԿ գլխավոր քարտուղար Յուրի Խաչատուրովի՝ ՌԴ վերադառնալուց հետո։

Կկարողանա՞ արդյոք Փաշինյանը Վլադիմիր Պուտինին ներկայացնել սպասվող ապացույցները՝ ակնհայտ կդառնա Լավրովի հաջորդ արձագանքից։

NEWSPRESS.am