Լավրովը հենց այնպես չէր ասի՝ խոստումներ, պայմանավորվածություններ են խախտվում. քաղտեխնոլոգ

Սերգեյ Լավրովի հայտարարությունը շատ ավելի լուրջ է: Այն, որ Ռուսաստանի հետ հարաբերություններն այնքան էլ լավ չեն, երևում էր դեռ մի 2 ամիս առաջ, հետո արդեն՝ Լավրովի հայտարարությունից հետո, երբ հանրահավաքի ժամանակ Նիկոլ Փաշինյանը հայտարարեց, որ մեր հարաբերությունները Ռուսաստանի հետ լավ են, գոնե ինձ համար պարզ էր, որ դա այդպես չէ: Այդ մասին այսօր լրագրողների հետ հանդիպման ժամանակ ասաց քաղտեխնոլոգ Կարեն Քոչարյանը: 

«Ես գիտեի, որ հարաբերությունները վատ են, որովհետև ես հետևում եմ ռուսական մամուլին, իսկ մենք գիտենք՝ ինչ է ռուսական մամուլը, երբ նայում ես՝ ովքեր են գրում, ինչեր են գրում, հասկանում ես, որ դա «վերևից» ուղղահայաց տրված է և տարածվում է, և բավականին կոշտ են գնահատականները: Ես շատ մեղմ եմ ասում՝ կոշտ են, որովհետև որոշ դեպքերում չափերն անցնում են, բայց դա գալիս է նրանից, որ երբ ասում են՝ պայմանավորվածություններ, ուրեմն եղել են պայմանավորվածություններ, որ նախկին իշխանություններին «չկպնեն», այդպես խախտվում են պայմանավորվածությունները»,- նշեց բանախոսը:

Կարեն Քոչարյանի ենթադրությունն է, որ եղել են պայմանավորվածություններ. նա չի կարծում, որ Լավրովը հենց այնպես պետք է ասեր, որ խոստումները՝ նախկին իշխանություններին «չկպնելու» մասին, խախտվում են: 

«Մի քանի մեսիջներ կան, այդ թվում՝ բավականին մտահոգիչ՝ կապված առայժմ տնտեսական բլոկի հետ: Քանի որ Ռուսաստանը Հայաստանի տնտեսական հատվածով ամենամեծ գործընկերն է, այն էլ մի ժամանակահատվածում, երբ մեզ մոտ տնտեսությունն այնքան էլ լավ վիճակում չէ, առջևում ձմեռ է, ասում են՝ կարող է գազը թանկացվի, մեսիջներ կան տարբեր, որ Ռուսաստանում բնակվող բիզնեսմեններին ներքին կարգով առայժմ ասված է, որ գումար Հայաստան չուղարկեն, դա պարզ սխեմա է»,- նկատեց Քոչարյանը: 

Քաղտեխնոլոգը նշեց նաև, որ դեռ Լավրովի առաջին հայտարարությունից հետո էր ինքը գրել, որ երկու օրից Լարսում քարաթափումներ կսկսվեն, այդ ժամանակ պարզապես հերթ առաջացավ. «Իհարկե, հետո մեզ բացատրեցին, որ տարվա այս ժամանակահատվածում միշտ հերթեր առաջանում են: Աստված իրենց հետ, եթե այդպես են բացատրում»,- ասաց նա: