Ռուսները կարծում են, որ Խաչատուրովին կալանավորելը կամ գործ հարուցելը խաղում է ՀԱՊԿ-ի անվան հետ. Կարեն Քոչարյան

Ես չգիտեմ՝ ինչ են պայմանավորվել Փաշինյանն ու Պուտինը նախկին երկու հանդիպումների ժամանակ և հիմա ինչ են քննարկելու: Ենթադրվում է, որ այս ընթացքում երեք անգամ Պուտինն Ալիևի հետ է հանդիպել, չի բացառվում նաև Ղարաբաղի խնդրի շուրջ ինչ-որ հարցեր քննարկելը: Այդ մասին այսօր լրագրողների հետ զրույցում ասաց քաղտեխնոլոգ Կարեն Քոչարյանը՝ պատասխանելով այն հարցին, թե ի՞նչ սպասել երկու երկրների առաջնորդների հետ հանդիպումից և արդյոք այդ հանդիպումը կմեղմացնի հայ ռուսական հարաբերությունները: 

Քաղտեխնոլոգը վստահ է, որ քննարկվելու են հայ-ռուսական հարաբերությունները. «Պարզ է, որ ռուսական կողմն առայժմ բաց հայտարարում է միայն Խաչատուրովի մասին, որովհետև, թեև Խաչատուրովը ՀՀ քաղաքացի է, այնուամենայնիվ, նա ՀԱՊԿ գլխավոր քարտուղարն է: Ռուսները՝ որպես այդ կառույցի հիմնադիր կամ նախաձեռնող, գտնում են, որ Խաչատուրովի կալանավորումով կամ գործ հարուցելով, խաղում են կառույցի հեղինակության հետ: Դա ես ասում եմ այն, ինչ գրվում է, բայց մամուլում ասվում է նաև, որ բարի լինեիք, հետ կանչեիք Խաչատուրովին, հետո ձեզ մոտ՝ որպես արդեն միայն Հայաստանի Հանրապետության քաղաքացի, ինչ ուզում էիք, անեիք: Դուք հիմա դատում եք ոչ միայն ՀՀ քաղաքացուն, այլ նաև փորձում եք դատել ՀԱՊԿ գլխավոր քարտուղարին: Այս առումով բաց է, մնացած բոլոր առումներով ընդամենը մեսիջներ են»,- նշեց Կարեն Քոչարյանը:

Ըստ բանախոսի՝ Ռուսաստանի, Միացյալ Նահանգների, Չինաստանի, Իրանի նման երկրները՝ աշխարհաքաղաքական կենտրոնները, երբեք չեն ադապտացվելու մեզ, ադապտացնելու են մեզ: «Եթե կարող ենք չադապտացվել, հալալ է մեզ, եթե այն, ինչ անում ենք մենք, կարողանանք մարսել, խնդիր չկա, պետք է այդպես էլ անել, բայց պետք է հաշվարկենք՝ կարո՞ղ ենք, թե՞ ոչ, եթե չկարողանանք, դա կարող է բոլորիս քթերից գալ, ՀՀ յուրաքանչյուր քաղաքացու»: