Մարտական հերթապահություն իրականացրած զինծառայողները զրկվում են բուհերում իրենց զեղչից․ ԿԳՆ-ն չի կարողանում բացատրություն տալ

Արդեն մեկ շաբաթ է, ինչ Հայաստանում սկսվել է նոր ուսումնական տարին։ Մինչ ուսումնական տարվա սկսվելն արդեն պարզ դարձավ, որ այս տարի թե՛ դպրոցներում և թե՛ բուհերում ամեն ինչ հարթ չի լինելու, քանի որ աշակերտների ու դիմորդների թիվը զգալի նվազել է։ Բարձրագույն ուսումնական հաստատություններում այս խնդիրը մի փոքր այլ է։ Այնտեղ դասախոսները ստիպված էին ձգել իրենց գոտիները, քանի որ ուսանողների թվի նվազման հետ մեկտեղ նվազեցին դասաժամերը, մի շարք բաժիններում անգամ ուսանողներ չկան։ Արդյունքում՝ նոր ուսումնական տարին իր հետ բերեց նաև նոր խնդիրներ։

Սա հարցի ու խնդրի մեկ կողմն է։ Սակայն առավել բարդ իրավիճակ է համալսարաներում։ Զինվորական ծառայության ժամանակ մարտական հերթապահություն իրականացրած այն զինծառայողները, ովքեր 4 տարի շարունակ օգտվել են իրենց համապատասխան զեղչից, մագիստրատուրայի առաջին կիսամյակում զրկվում են դրանից։

Այս հարցի շուրջ NEWSPRESS.am-ը կապ հաստատեց Կրթության ու գիտության նախարարության համապատասխան բաժնի հետ, որտեղ ասացին, որ օրենքն այդպես է, ու մագիստրատուրա ընդունված ու մարտական հերթապահություն իրականացրած ուսանողներն առաջին կիսամյակում չունեն զեղչ։

Ստացվում է, որ ինչ-ինչ անհայտ ու այլմոլորակային պատճառներից ելնելով՝ մագիստրատուրա ընդունված ու մարտական հերթապահություն իրականացրած ուսանողը մեկ կիսամյակ դառնում է մարտական հերթապահություն չիրականացրած ուսանող։ Թերևս այս հարցին այլ մոտեցում չի էլ կարելի ցույց տալ, քանի որ իրոք իրավիճակը ծիծաղելի է:

Մեկ այլ զավեշտալի իրավիճակ է անապահով ընտանիքներ ուսանողների մոտ։ Այդտեղ օրենքն ավարտվում է 23 տարեկանում։ Անապահովության փաստաթուղթ ունեցող ուսանողները 23 տարեկանից հետո զրկվում են զեղչից։ Այստեղ նախարարությունը միգուցե հաշվարկել է, որ այդ տարիքում նա այլևս չի դառնում անապահով ընտանիքի անդամ. ունենում է աշխատանք, ստանում է բարձր աշխատավարձ ու կարող է ուսման վարձը վճարել։ Սրանք զեղչային համակարգի, մեղմ ասած, խայտառակություններից երկուսն են, որոնք անընդհատ քննարկվում են ուսանողության շրջանում։

Մեր տեղեկություններով՝ վերջին մի քանի օրերին բազմաթիվ ծնողներ ու ուսանողներ, ովքեր ունեցել են մարտական հերթապահության զեղչ, սակայն դրանից զրկվել են մագիստրատուրայի առաջին կիսամյակում, զանգերով իրենց բողոքն են արտահայտում ԿԳ նախարարությունում ու բուհերում։ Սակայն այդ հարցին այդպես էլ հստակ պատասխան չի տրվում։ Պատասխանը մեկ է՝ օրենքն է այդպիսին։