Յուրի Խաչատուրովի փաստաբանը՝ ԱԱԾ տնօրենի և ՀՔԾ պետի սկանդալային ձայնագրության մասին

Գաղտնալսված հարցազրույցը ապացուցեց, որ Յուրի Խաչատուրովի նկատմամբ քաղաքական հետապնդում է իրականացվում։

Այս մասին NEWSPRESS.am-ի հետ զրույցում ասաց Յուրի Խաչատուրովի փաստաբան Միհրան Պողոսյանը՝ անդրադառնալով ԱԱԾ տնօրեն Արթուր Վանեցյանի և ՀՔԾ պետ Սասուն Խաչատրյանի հեռախոսազրույցին։

Նրա խոսքով՝ ինչպես և նախապես իրենք բարձրաձայնել են՝ Յուրի Խաչատուրովի նկատմամբ հարուցված գործը քրեական ոչ մի տարր չի պարունակում, և Յուրի Խաչատուրովին անհիմն մեղադրանք է առաջադրվել։

«Ինչպես նշեց ՀՔԾ պետի անվան տակ հանդես եկող անձը, տանում են կալանքի, քանի որ ինքն արդեն իսկ հայտարարել է»,- ասաց փաստաբանը։

Անդրադառնալով դիտարկմանը, թե Նիկոլ Փաշինյանը հայտարարել էր, որ դատարանի որոշումների վրա ազդեցություն չի լինելու և, փաստորեն, այս հարցազրույցը հակառակն ապացուցեց, Միհրան Պողոսյանը նկատեց․

«Հրապարակված տեսանյութից երևում է, որ տվյալ դատարանում մինչև իսկ վարույթն իրականացնող մարմինի կողմից կալանավորումը որպես խափանման միջոց կիրառվելու միջնորդություն էր ներկայացվել դատարան, ինչը  այդ հեռախոսազրույցում խոսող անձինք արդեն իսկ տեղյակ էին, թե որ դատավորն է տվյալ միջնորդությունը քննելու, դեռևս չներկայացրած վիճակում։ Եթե տեսանյութի բառապաշարով խոսենք՝ այդ զրուցողներին դուխ էին տվել՝ տվյալ որոշումը կայացնելու համար»,- ասաց փաստաբանը։

Նրա համար ակնհայտ է նաև, որ տվյալ խոսակցությունից որոշումը, իր իսկ խոսքով, օդի և ջրի պես պետք է վարույթն իրականացնող մարմնին, որպեսզի դրանով նրանք իրենց մտադրություններն ի կատար ածեն և ինչ-որ անձանցից ցուցմունքներ ստանան։

Առայժմ փաստաբանը չի կարող ասել, թե որևէ քայլ իրենց կողմից կձեռնարկե՞ն այս հարցազրույցից հետո, սակայն նա նկատում է, որ առաջին հերթին քրեական գործ պետք է հարուցվի ո՛չ թե տեսանյութն ու հեռախոսազրույցը տարածելու համար, այլ զրույցում առկա փաստական հանգամանքները պարզելու ուղղությամբ։

«Այդ քրեական գործը ոչ ՀՔԾ ու ո՛չ էլ ԱԱԾ-ն չեն կարող քննել, քանի որ այն ամիջապես կապված է այդ կառույցների ղեկավարների հետ։ Հաշվի առնելով նաև, որ մինչ օրս ԱԱԾ-ն և ՀՔԾ-ն հռչակվել էին որպես «հեղափոխության» պաշտպաններ, կարծում եմ, որ ՀՀ-ում այս պահին չկա այնպիսի իրավապահ մարմին, որն ունակ է օբյեկտիվ գնահատական տալ այս տեսանյութում այս անձանց վերաբերող խոսակցությունը։ Հակառակ պարագայում՝ պետք է լինեն քրեական մեղադրանքներ, քանի որ հեռախոսազրույցում կոնկրետ միջամտություն դատարանի հանդեպ արձանագրվում է»,- եզրափակեց Միհրան Պողոսյանը։