Աննախադեպ իրավիճակ է ստեղծվել. Արա Բաբլոյանը՝ ԱԱԾ և ՀՔԾ պետերի ձայնագրության մասին

Շատ մտահոգիչ է, որովհետև բավականին անպատկերացնելի մի երևույթ է տեղի ունեցել որ կարելի է ԱԱԾ ղեկավարին գաղտնալսել: Մեզ համար աննախադեպ մի իրավիճակ է ստեղծվել: Այդ մասին այսօր Ազգային ժողովում լրագրողների հետ զրույցում ասաց ԱԺ նախագահ Արա Բաբլոյանը՝ մեկնաբանելով ԱԱԾ տնօրենին և ՀՔԾ պետին ձայնագրելու և հրապարակելու փաստը: 

«Մենք պետք է այդ հարցին անդրադառնանք՝ համաձայն օրենսդրությամբ սահմանված կարգի և Սահմանադրության, իսկ Սահմանադրությունը և ԱԺ կանոնակարգը հստակ են: Այնպես որ՝ բոլոր առաջարկները, որոնք հնչեցին հայտարարությունների ժամին, այդ ամենը կանոնակարգված է Սահմանադրությամբ»,- ասաց ԱԺ նախագահը: 

Հարցին, թե ինչպես է վերաբերվում այն երևույթին, երբ դատավարը զանգահարում է ԱԱԾ ղեկավարին, Բաբլոյանը պատասխանեց. «Թույլ տվեք՝ չմեկնաբանեմ, որովհետև եթե հարցը պետք է քննարկվի, պարզաբանվի, թույլ տվեք, որ դա տեղի ունենա ոչ թե մեկ անձի կողմից, այլ համապատասխան օրենքներին համաձայն»: 

Մեկնաբանելով Նիկոլ Փաշինյանի՝ օլիգարխներին «պառկեցնելու», նրանց զինաթափելու կոչերը՝ Բաբլոյանը նշեց. «Մենք մեր քայլերը պետք է իրականացնենք 4 ուղղությամբ՝ երկրի անվտանգության ապահովման ուղղությամբ, տնտեսության զարգացման, բնակչության բարեկեցության բարելավման, ժողովրդավարության էլ ավելի ամրապնդման: Այսինքն՝ որևիցե քայլ-նահանջ ինձ համար անընդունելի է»,- եզրափակեց ԱԺ նախագահը: