«Եթե հավաքվում են քեֆ-մեֆ անելու՝ թո՛ղ չկապեն այն Անկախության հետ»․ ԳԽ պատգամավոր

Ինչպես և մի քանի տասնամյակներում, այսօր էլ Անկախության տոնը նշվում է առանց Գերագույն խորհրդի պատգամավորներին հիշելու։ Սեպտեմբերի 21-ին կազմակերպվելիք միջոցառումներին անդրադառմալով՝ NEWSPRESS.am-ի հետ զրույցում իր մտահոգությունը հայտնեց Գերագույն խորհրդի պատգամավոր Վարդան Պետրոսյանը։

«Այսինքն՝ տենց բան չի եղել, չեն եղել ժողովրդի ձայն ստացած Գերագույն խորհրդի պատգամավորներ, ովքեր հռչակել են այդ անկախությունը, ովքեր իրենց վրա են կրել այդ պատերազմական ժամանակաշրջանը և պատասխանատվությունը։ Այդ մարդիկ 1995 թվականից հետո ուղղակի ցնդել են, անհետացել, գոյություն չունեն»,- սրտնեղած ասում է Վարդան Պետրոսյանը։

Նա նկատում է, որ Անկախության օրվա հռչակման նախօրեին առաջին խորհրդարանի 100-ամյակն է, որտեղ նաև հրավիրված են ԳԽ-ի պատգամավորները։ ԳԽ պատգամավորն ակնկալիքներ չունի, որ սեպտեմբերի 21-ին որևէ կերպ կհիշեն իրենց։

«Այստեղ անձերի խնդիր չէ, խնդիրը երևույթի մեջ է. արդյոք մենք ամաչո՞ւմ ենք 90-ականների ժողովրդի ընտրությունից, դա ամոթաբե՞ր էր, ինչո՞ւ չենք հիշում»,- ասում է ԳԽ պատգամավորն ու նկատում, որ այն պահից, երբ ընտրությունները «բռնազաղթվեցին» կուսակցությունների կողմից, ժողովրդի կարծիքն արդեն սկսեցին հաշվի չառնել․ իշխանությունն սկսեց առաջ «բրթել» իր ցուցակները։

Վարդան Պետրոսյանը վստահ է, որ հերթական անգամ անկախության հռչակման տոնակատարությանը ԳԽ պատգամավորները չեն հրավիրվի ու հերթական անգամ պետական շքանշանները կհանձնեն անկախության հետ քիչ կապ ունեղող կամ գուցե չունեցող մարդկանց։

Նա՝ ինքը, վստահեցնում է, որ նույնիսկ եթե իրեն հրավիրեին, չէր գնա. իր բարձրագույն պարգևը ժողովրդի քվեն է, որն ստացել է ժամանակին, ու որից բարձր արժեք այլևս չկա։ 

«Սա արժեհամակարգային խնդիր է։ Չգնահատելը շատ վատ է, ու կարծում եմ այս առումով առանձնակի բան չի փոխվել»,- նկատում է Վարդան Պետրոսյանն ու համեմատական անցկացնում․ «Դուք ո՞նց կվերաբերվեք մի գերդաստանի, որի անդամները հավաքվում են խնջույքի ու իրենց ավագներին մոռանում են ծերանոցում: Ի՞նչ գնահատական կտաք սրան»,- հարցնում է ԳԽ պատգամավորն ու վստահեցնում, որ մյուս պատգամավորները ևս վիրավորված են։ Նա կրկնում է, որ սա անձի խնդիր չէ, այլ պատմության, որը նոր սերունդը չի հիշում ու չի հարգում։

«Եթե հավաքվում են, ինչ-որ քեֆ-մեֆ անելու, խնդիր չկա, թո՛ղ հավաքվեն, քեֆ անեն, բայց չկապեն Անկախության հետ, ուղղակի ասեն՝ հավաքվել ենք, քեֆ ենք անում, խնդիր չկա: Արժեհամակարգային խնդիր կա՝ ինչի համար են տոները, ինչ արժեք ունեն։ Եթե ինչ-որ մեկը չի հարգում դիմացինին՝ դա իր խնդիրն է, ոչ թե դիմացինը արժանի չէ հարգանքի։ Այս խնդիրը միշտ կա»,- նկատում է պատգամավորը։

Նրա խոսքով՝ իշխանավորներն իրենք են արժեզրկել համակարգը, և հույս էլ չունի, թե երբևէ կվերադառնանք նախկին համակարգին, և արժեքները կվերականգնվեն։

«Թերություններ, իհարկե, եղել են․ բայց չեմ կարծում, որ այդ ժամանակահատվածը պատմության համար ամոթալի է, եղել ու այն չպետք է հիշել»։

Վարդան Պետրոսյանը նկատում է, որ պարզապես ձեռք բերած հաղթանակը պահել էր հարկավոր, սակայն իշխանություններն սկսեցին այնքան մոռանալ հաղթանակի մասին, որ այն արժեզրկվեց։

«Բարելավվեց միայն իշխանավորների վիճակը, իսկ ժողովուրդը մնաց անտեսված»,-եզրափակեց ԳԽ պատգամավորը։

Զրույցը՝ Արմինե Մկրտումյանի