Փաշինյանը գտնվում է հեղհեղուկ վիճակում և առայժմ փորձում է հարցերը լուծել «բազարների» միջոցով․ ԳԽ պատգամավոր

Գերագույն խորհրդի պատգամավոր Վարդան Պետրոսյանը վստահեցնում է` ընդհանուր առմամբ, Հայաստանում համակարգը չի փոխվել, միայն այնպիսի տպավորություն է, որ նոր կառավարության անդամները լավ չեն հասկացել, թե ինչու են հայտնվել այդտեղ։

Նա NEWSPRESS.am-ի հետ զրույցում, անդրադառնալով Երևանի ավագանու ընտրություններին, նկատեց, որ հերթական անգամ կուսակցություններին հաջողվում է ամեն ինչ  խեղել։

Վարդան Պետրոսյանի գնահատմամբ՝ սա քաղաքական կողմնորոշման ընտրություն է։ 

«Վարչապետն ակնարկում է, որ ձայն են տվել-չեն տվել, բան են ակնկալում, նեղացած են, նեղացած չեն, գործընկեր են, գործընկեր չեն, այսինքն՝ «բազարի» մեջ են, հերթական անգամ շանտաժի ու «բազարի» մեջ են։ Դիվիդենտներ են պահանջում ու միայն սպասարկում անձնական շահերը, որոնք ոչ մի կապ չունեն ժողովրդի հետ»,- նկատում է Վարդան Պետրոսյանը։

Նրա դիտարկմամբ՝ ուզելով, թե չուզելով, ժողովուրդը կանգնեց մեկ այլ ընտրության առաջ։ Քննարկելով սև ու սպիտակը՝ իշխանությունն ինքը բերեց ժողովրդին այդ իրավիճակի առաջ։

«Սա քաղաքական կողմնորոշման խնդիր է․ արդյոք ժողովուրդը տե՞ր է մայիսյան հեղափոխության իր պահանջներին, թե՞ փոշիացել են դրանք։ Նույնիսկ քողարկված երևույթ է գնում՝ հերթական անգամ ժողովրդին դուխաթափ անելու։ Բայց կարծում եմ՝ ժողովուրդը պետք է կարողանա տեր կանգնել իր պահանջին և ասել՝ հարգելի՛ Նիկոլ Փաշինյան, մենք քեզ ձայն ենք տալիս հիմա, ձայն ենք տալու ԱԺ ընտրություններին, բայց դու պետք է կատարես մեր պահանջները՝ արդարությունը վերականգնես, թալանը վերադարձնես»,- նկատում է ԳԽ պատգամավորը։

Նրա գնահատմամբ՝ այս պահին ստեղծվել է բարդ իրավիճակ․ «Փաշինյանն իրավական քվե դեռ չի ստացել, գտնվում է հեղհեղուկ վիճակում և առայժմ փորձում է հարցերը լուծել «բազարների» միջոցով»։