Կամ «թռնել», կամ` այրվել․ երկու քարի արանքում

ՀՀ 2-րդ նախագահ Ռոբերտ Քոչարյանը հերթական հարցազրույցն է տվել ռուսական ԶԼՄ-ներից մեկին՝ այս անգամ Коммерсант-ին, որի ընթացքում անդրադարձել է Սերժ Սարգսյանի լճացած կառավարմանը, Նիկոլ Փաշինյանի պոպուլիզմին։

Քոչարյանն առանձնահատուկ շեշտել է օգոստոսի 31-ին՝ իր ծննդյան օրվա առթիվ Ռուսաստանի նախագահ Վլադիմիր Պուտինից ստացած զանգն ու նշել․ «Այս զանգը լուրջ աջակցություն է, բայց ես երբեք չեմ հանրայնացրել նման հարաբերությունների առկայությունը»։

Ռոբերտ Քոչարյանն այս հարցազրույցում խոսել է վարչապետ Նիկոլ Փաշինյանի մասին, և ի տարբերություն նախորդ հարցազրույցներում օգտագործած մեղմ հռետորաբանությանը, արտահայտվել է շատ կտրուկ՝ Փաշինյանին համեմատելով Վենեսուելայի նախկին նախագահ Ուգո Չավեսի և գիսաստղի հետ՝ ընդգծելով, որ այդ աստղը մի օր կարող է վառվել։

Իսկ որ Փաշինյանը մի օր կարող է վառվել՝ արդեն իսկ ակնհայտ է դառնում՝ օր օրի մարող էյֆորիայի ֆոնին։

Վարչապետության 4 ամսվա ընթացքում Նիկոլ Փաշինյանն այդպես էլ աչքի չընկավ կառավարման ոլորտում հստակ ռազմավարությամբ՝ ընդամենը բավարարվելով հանրահավաքային հայտարարություններով և ֆեյսբուքյան ուղիղ եթերներով, որոնք արդեն իսկ սկսել են ձանձրացնել հանրությանն իրենց և՛ անբովանդակ, և կրկնվող հարցերով, որոնց վարչապետը պատասխանում է բուռն պոպուլիզմով։

Նիկոլ Փաշինյանն այդպես էլ այս չորս ամսվա ընթացքում ընդդիմադիր քաղաքական գործչից վարչապետի չվերածվեց, իսկ որ ամենավատն է՝ չգիտակցեց ստանձնած պատասխանատվության ողջ ծանրությունը՝ հաշվի առնելով գլոբալ տարածաշրջանային լարվածությունն ու Արցախի և ՀՀ սահմանների անվտանգության խնդիրը, որի ուղղությամբ ևս «ձեռքերը թափ տված» վիճակում է։ 

Մեր երկրի թիվ մեկ դեմքը երկիրը շարունակում է բաժանել սևերի և սպիտակների՝ Ադրբեջանի և Թուրքիայի՝ Ղարաբաղյան հարցում միավորման ֆոնին՝ առանց գիտակցելու, որ հրապարակային կոչերը չեն փրկելու ֆիասկոյի պահին և իրեն ոչինչ չի մնալու, քան՝ պարզապես «թռնել» երկրից։

Գիսաստղը կվառվի, երբ հասարակությունը ի վերջո գիտակցի, որ երկրւմ բացի մի քանի հոգու բռնել բաց թողնելուց, ասֆալտներին պառկեցնելուց ու սրան-նրան պատերին տալուց չի տարվում տնտեսական քաղաքականություն, երկիր չի բերվել գեթ մեկ դրամ ներդրում, որի բացակայությունը շատ շուտով կզգանք։

Գիսատսղը կվառվի, երբ ի վերջո Փաշինյանին ծափահարողներն իրենց կաշվի վրա զգան, որ իրենց կյանքի որակը ոչ միայն չի լավացել, այլ ավելին՝ զրկվել են այդ որակներից որոշներից։

Այնպես որ՝ շանտաժով իշխանության եկած վարչապետ Նիկոլ Փաշինյանն այդքան էլ նախանձելի իրավիճակում չէ, քանի որ այս անգամ նրան չեն փրկի քայլերն ու փողոց փակելը և գուցե իսկապես այրվի իր իսկ վառած կրակում։

NEWSPRESS.am