Երեխաները կա´մ մեկնել են արտագնա աշխատանքի, կա´մ որպես պայմանագրային զինծառայող ծառայում են. արծվաշենցիները՝ կառավարության դիմաց

Մենք հակահեղափոխություն չենք անում, մենք չենք բողոքում այլ պահանջում ենք մեր հասանելիքը։ Այս մասին հայտարարեցին Կառավարության դիմաց իրենց խնդրով ակցիա կազմակերպած ասրծվաշենցիները։ Նրանք մեծով ու փոքրով եկել էին հանդիպելու վարչապետին ու պահանաջելու վերականգնել արդարությունը։

«Մենք այդ արդարության համար ենք պայքարել Փաշինյանի հետ, հիմա ինչու չպետք ա նա ցանկանա հանդիպել մեզ։ Բա ասում էր՝ երկիրը ժողովրդինն ա, խոսքը ժողովրդինն ա, բա մենք էդ ժողովուրդն ենք, եկել ենք, ինչո՞ւ չի հանդիպում մեզ»,- NEWSPRESS.am-ի հետ զրույցում ասաց վրդովված արծվաշենցի մի կին։

Հարցին, թե ինչ են պատրաստվում անել, եթե վարչապետը իրենց չհանդիպի, նա նկատեց որ կդիմեն ծայրահեղ միջոցների, բայց դեռ հավատում են, որ վարչապետը կիջնի ներքև։

«Քայլ արա իջի ներքև» բացականչություններով գյուղացիները վստահեցնում էին, որ չեն գնա մինչև իրենց խնդիրը չլուծվի։ Նրանք պատմում են, որ տեղահանման պահին՝ 1992-ին, չեն էլ հասկացել, որ վերջնական են լքում իրենց տները ու գրեթե ոչինչ չեն վերցրել իրենց սեփականությունից:

Նրանց մեծ մասն այսօր ապրում է անմխիթար վիճակում գտնվող տներում, որտեղ նախկինում ռուսներ կամ թուրքեր են ապրել: Արծվաշենցիները նշում են, որ մինչև այսօր ոչ մի աջակցություն չեն ստացել պետությունից: Ծայրը ծայրին հասցնելու համար նրանց երեխաները կա´մ մեկնել են արտագնա աշխատանքի, կա´մ որպես պայմանագրային զինծառայող ծառայում են բանակում: Կառավարությունն ընդամենը 300 հազար դրամ օգնություն է տրամադրել՝ որպես փոխհատուցում, մի քանի տարի առաջ:

«42 տարեկան եմ՝ նոր եմ տուն սարքում, մենք դուրս ենք եկել մեր ոտնահարված իրավունքները վերականգնենք և չենք գնա այստեղից մինչև հստակ լուծումներ չառաջարկեն մեզ»,- ասաց նեղսրտած մի տղամարդ։

Ավելի ուշ, սակայն, Նիկոլ Փաշինյանը իջավ ու հանդիպեց արծվաշենցիների հետ: