Ատելություն չկար, բայց հիստերիկացված քարոզարշավ էր. Փաշինյանը մրցակցության մեջ է բոլորի հետ. Արարատ Զուրաբյան

Երևանի ավագանու «Երևանցիներ» դաշինքի առաջին համար Արարատ Զուրաբյանը ուզում է հավատ, որ ընտրությունները կլինեն արդար՝ առանց խախտումների: Այս մասին Զուրաբյանն ասաց քարոզարշավի ժամանակ՝ լրագրողների հետ զրույցում:

Նա միայն մի բացասական երևույթ է նկատել այս օրերին՝ հասարակության մի մասի մոտ օբյեկտիվ գնահատականներ տալու բացակայություն:

«Մեկ-մեկ հասարակությունը հիվանդանում է՝ ծայրահեղության մի աստիճանից ընկնելով մյուս ծայրահեղության աստիճան: Իշխանության պատկերացումն է՝ եթե եկել ենք իշխանության, պետք է վերցնենք ամեն ինչ, բայց, կարծում եմ, հենց այդ իշխանությունը պահպանելու համար պետք է տարբեր ուժեր ներկայացվեն, հակակշիռների ու զսպումների մեխանիզմ լինի»,- ասաց Արարատ Զուրաբյանը:

Ըստ նրա՝ ատելություն չկար, բայց հիստերիկացված քարոզարշավ էր:

«Բավական է դուրս գալ փողոց և հասկանալ, որ մեկի ռեկլամային կամպանիան ավելի հուժկու է, իսկ եթե խոսում ենք՝ հավասար էր, թե ոչ, ես մրցակցության մեջ չեմ Նիկոլ Փաշինյանի հետ, բայց Փաշինյանը մրցակցության մեջ է բոլորի հետ»,-ասաց Զուրաբյանը՝ հավելելով, որ մրցակցությունը քաղաքական թշնամանք չէ: