«Տակփորոցի». Ինչպես Միրզոյանն ու Աղաջանյանն աշխատանքից հանեցին Աճեմյանին և ինչու պաշտոնի նշանակեցին Պապիկյանին

Նոր Հայաստանի կառավարության գլխին գործերի կառավարիչ չի գալիս: Արդեն երկրորդ պաշտոնյան է, ով լրջագույն սկանդալի մեջ է հայտնվում:

Առաջինն «Աշտարակ կաթը» «խլել փորձող» Գևորգ Աճեմյանն էր, ում հեռացման հիմնական պատճառը դարձավ նրա կողմից պաշտոնեական դիրքի չարաշահումը և դրա պատճառով «վաստակած» քննադատություններն ու ճնշումը: Երկրորդն արդեն Վահան Պապիկյանն է, ով աշխատանքից ազատեց գլխավոր գործավար Նարե Գրիգորյանին, ինչին կրկին հաջորդեց սկանդալն ու քննադատությունները:

Գրեթե երկուսն էլ նույնանման սկանդալի մեջ հայտնված պաշտոնյաներ են, սակայն նրանց մեջ մեկ էական տարբերություն կա. Գևորգ Աճեմյանը չէր վայելում աշխատակազմի ղեկավարի սերն ու համակրանքը, իսկ Վահան Պապիկյանը ճոխ-ճոխ օգտագործում է այն, անգամ այն աստիճան, որ Աղաջանյանը մի կողմ դնելով իր «պաշտոնեական վեհությունը» փորձել է մեկնաբանել ստեղծված վիճակը և «փեշերը փռել» իր կողմից հովանավորվող Պապիկյանի վրա:

NEWSPRESS.am-ին որոշ մանրամասներ է հայտնի դարձել այս շղթայից:

Բանն այն է, որ Աղաջանյանը, ով Նարե Գրիգորյանի պատմության մեջ փորձում է ներկայանալ իբրև չեզոք ու անաչառ կողմ, դեռևս ամիսներ առաջ գործերի կառավարչի յուղոտ պաշտոնն ամեն կերպ փորձել է տալ Պապիկյանին, սակայն Փաշինյանը, համակրելով Գևորգ Աճեմյանին՝ իբրև ազնիվ հավատացյալի, անձամբ էր որոշել այդ պաշտոնում տեսնել հենց նրան: 

Այդպես էլ եղավ՝ Աճեմյանը նշանակվեց, միայն թե հետագայում Արարատ Միրզոյան-Էդուարդ Աղաջանյան զույգի օպերացիայի շրջանակներում «մութ գործերը» սկսեցին հանձնարարվել Աճեմյանին, որտեղ էլ ոչ այդքան մեծ փորձառություն ունեցող մարդու համար վրիպումն անխուսափելի դարձավ՝ «Աշտարակ կաթի» աղմուկը բարձրացավ: 

Նույն աղբյուրի փոխանցմամբ՝ արդեն բարձրացած աղմուկը հնարավորինս շատ հրահրել ու տարածել են այդ զույգին սպասարկող բազմաթիվ ֆեյք էջերը, որպեսզի լուրը հասնի վարչապետին, հետևաբար՝ Աճեմյանին պաշտոնին թողնելը սխալ որոշում կլիներ:

Օպերացիան ավարտվել է մեծ հաջողությամբ: Աճեմյանի ազատումից ժամեր հետո Պապիկյանը շատ արագ գրավել է աթոռը:

Հատկանշական է, որ Էդուարդ Աղաջանյանն արդեն այնքան է մտել իր պաշտոնի դերի մեջ, որ սկանդալների մեջ հայտնվելու դեպքում անգամ կարծում է, որ չպետք է ինքն իր աթոռի «բարձրությունից» իջնի և մեկնաբանի. դա այն դեպքում, երբ իր վարչապետն ուղիղ եթերով պատասխանում է ֆեյսբուքյան օգտատերերի հարցերին:

NEWSPRESS.am