Սկանդալային տեսանյութ և ձայնագրություն. ինչպես է Ռաֆայել Մեհրաբյանը հարվածում 16-ամյա սպորտսմենուհուն. կան վկաներ
Բռնցքամարտիկ Անժելիկա Ստեփանյանի քույրը՝ Նանե Ստեփանյանը, վստահեցնում է՝ անցյալ տարի իր 16-ամյա քրոջը մարզիչ Ռաֆայել Մեհրաբյանն իսկապես ապտակել է։
Նա NEWSPRESS.am-ի հետ զրույցում պատմեց, թե ինչպես Բուլղարիայի մայրաքաղաք Սոֆիայում 2017 թվականի հուլիսին կայացած մինչև 18 տարեկան աղջիկների բռնցքամարտի Եվրոպայի առաջնության ժամանակ իր քույրը՝ 51 կգ քաշային կարգում Հայաստանը ներկայացնող Անժելիկա Ստեփանյանը, պարտվել է, ինչի համար նրա մարզիչը՝ Ռաֆայել Մեհրաբյանը, ապտակել է աղջկան և հայհոյել։
Աղջիկները մեկ տարի լռել են տարեց վարպետի վարկանիշը չգցելու և դատական քաշքշուկների մեջ չընկնելու համար, նրանք բողոք են գրել ՀԲՖ-ին, որի հիման վրա էլ մարզչին ազատել են աշխատանքից։
«Անժելիկայի հետ, ովքեր եղել են, տեսել են, որ նա խփել է իմ քրոջը, ու երբ քույրս բարձրացել է սենյակ ու վիրավորված լացել, հետևից բարձրացել է, ու էլի մարզիկ է եղել. Ռուսաստանի հավաքականի հայ մարզուհի Նունե Ասատրյանի մոտ Մեհրաբյանը վերցրել է կողքը դրված ծաղկամանն ու ասել, էս ա գլխիդ կխփեմ, եթե լացել ես, ու հայհոյել է։ Քույրս պատմում է, որ թուրքերն ու ադրբեջանցիները, որ իրենց տեսնում էին՝ ծիծաղում էին կատարվածի համար»,- մեզ հետ զրույցում ասաց Նանե Ստեփանյանը։
Ու թեև այդ ժամանակ Ռաֆայել Մեհրաբյանը հայհոյել է նաև Բուլղարիա մեկնած մյուս մարզուհիներին՝ Լիանա Մանուկյանին ու Անահիտ Արոյանին, սակայն այսօր աղջիկները հերքում են դա և հայտարարում, որ Անժելիկան հորինում է թե՛ ապտակի, թե՛ հայհոյանքների մասին պատմությունը։ Նրանք նույնիսկ անկեղծ զարմացել են, թե ինչու է Անժելիկան նման ստահոդ տեղեկություն տարածել։
Իսկ Անժելիկայի քույրը՝ Նանեն, չի զարմանում, որ աղջիկներն այսօր պաշտպանում են Մեհրաբյանին՝ վարկաբեկելով իր քրոջը։
«Այն, որ նման բան եղել է՝ նա կասկած չունի, քանի որ կա վկայի հետ զրույց այդ մասին և կա տեսանյութ, ինչը մեզ Նանան տրամադրեց։ Զրույցը տեղի է ունեցել վրացի մրցավար Զաալի Ջավախաձեի հետ, ով զարմացած է աղջիկների պահվածքից։
«Այն, որ Մեհրաբյանը խփել է աղջկան, ոչ միայն ես, այլև բոլոր այնտեղ գտնվողներն են տեսել: Ես չեմ հասկանում, թե այդ աղջիկներն ինչու են հերքում: Կոնկրետ ես՝ ում պետք է ասել եմ. և՛ ֆեդերացիային և՛ նախարարությանը»,- ասում է վրացի մրցավարը։
Բացի այդ, կա նաև տեսագրություն, թե ինչպես է մարզիչը հարվածում16-ամյա մարզուհուն։
Նանե Ստեփանյանի խոսքով՝ այսօր նույնիսկ նրանք են վկայություններ տալիս Մեհրաբյանի հարվածելու հետ կապված, ովքեր այդ ժամանակ Բուլղարիայում չեն էլ եղել:
Նա վստահեցնում է, որ քրոջ հարցը պարզապես շահարկվում է՝ կապված Բռնցքամարտի ֆեդերացիայի խնդրի հետ:
«Մարդիկ մտել են մի թիմի մեջ ու ֆեդերացիայի հարցով վիճում են և ուզում են զենք օգտագործել քրոջս հարցը և ներկայացնել այնպես, ինչպես իրենց է ձեռք տալիս, որպեսզի իրենց ուզածին հասնեն: Բայց մենք թույլ չենք տա շահարկել քրոջս հարցը»,-ասում է Նանե Ստեփանյանը:
Ի դեպ, օրերս Գագիկ Ծառուկյանը ՀԲՖ-ի խնդրի հետ կապված հանդիպում է հրավիրել. Նանե Ստեփանյանը պատրաստվում է անպատճառ մասնակցել այդ հանդիպմանը և ներկայացնել Ծառուկյանին խնդիրն այնպես, ինչպես որ կա: Նանեն պատրաստվում է նաև տեսանյութը ցույց տալ նրան:
Շարունակելի....
