Դեպի Ռուսաստան ուղևորափոխադրողների խնդիրը չի լուծվում, 20 մլն դրամ պետտուրք են վճարել, սակայն ՌԴ մեկնելու թույլտվություն չեն ստանում (տեսանյութ)
Հայաստանից Ռուսաստան ուղևորափոխադրում իրականացնողների խնդիրները շարունակում են չլուծված մնալ: Մեկ անգամ Տրանսպորտի, կապի և տեղեկատվական տեխնոլոգիաների նախարար Աշոտ Հակոբյանի, ապա նաև փոխնախարար Արմեն Փամբուխչյանի հետ հանդիպումները ցանկալի արդյունք չեն տվել, և նրանք այսօր հավաքվել են կառավարության դիմաց:
«Տուր սերվիս» ընկերության տնօրեն Արտակ Կնյազյանը NEWSPRESS.am-ի հետ զրույցում նշեց, որ արդեն 4 ամիս է՝ իրենք բողոքի ակցիաներ են իրականացնում և բարձրացնում են ուղևափոխադրման հետ կապված խնդիրները:
Յուրաքանչյուր անգամ Ռուսաստան մեկնելու թույլտվություն ստանալու համար վարորդները 9-18 նստատեղ ունեցող մեքենաների համար 50 հազար դրամ պետական տուրք են վճարում, 18-ից ավել նստատեղ ունեցող մեքենաների համար՝ 150 հազար դրամ:
«Վերջին մեկ ամսվա ընթացքում 250 թույլտվության համար մոտավորապես 20 մլն դրամ պետտուրք ենք վճարել: Այսօր ստացվում է, որ ունենք մի վիճակ, երբ վճարված կտրոնները մեր ձեռքում են, վճարել ենք այդ 50 և 150 հազար դրամները, ու մեզ բլանկ չենք տրամադրում, որ մենք կարողանանք մուտք գործել ռուսական սահմանից, առանց այդ բլանկի չի լինում: Այդ բլանկի տրամադրել-չտրամադրելու հարցն էլ համաձայնագրի արդյունք է, որ կնքվել է անցած տարվա նոյեմբերի 24-ին և ուժի մեջ է մտել այս տարվա ապրիլի 27-ին: Այդ համաձայնագրով ենթադրվում է, որ յուրաքանչյուր մեքենա՝ կապ չունի դատարկ է, թե ոչ, ՌԴ գնալու համար պետք է վերցնի մեկանգամյա թույլտվություն»,- ասաց Կնյազյանը:
Մեր զրուցակիցը նշեց, որ ի տարբերություն Ռուսաստանի՝ շատ երկրների հետ կնքած նույն համաձայնագրի, մեր համաձայնագիրը չի նախատեսում ոչ մի տարբերակ՝ առանց թույլտվության գնալու դեպի Ռուսաստան:
Սեպտեմբերի 25-ին փոխնախարար Փամբուխչյանը վարորդների հետ հանդիպման ժամանակ նրանց ասել է, որ նախարար Հակոբյանը պայմանավորվել է, որ 250 բլանկ պետք է ուղարկվի, նոր տենդերներ պետք է հայտարարվեն ու պետք է աշխատեն այնպես անել, որ այդ տենդերներով վարորդների աշխատանքն օրինականացվի, թեև, մեր զրուցակցի խոսքով, այն մարդիկ էլ, ովքեր տարիներ շարունակ ունեն տենդերներ, նրանք էլ «մեղրի մեջ չեն»:
Հարցին, թե նախարարությունից ինչպիսի՞ լուծումներ են առաջարկում, Կնյազյանը նշեց, որ ոչ մի լուծում էլ չեն առաջարկում, փոխարենը լուծում իրենք են առաջարկում՝ մի քանի կետից բաղկացած: Դրանցից մեկով, ի դեպ, պահանջում են նախարարության փոխադրումների քաղաքականության բաժնի պետի ու նրա տեղակալի ազատման դիմումները:
Մեր զրուցակիցը նշեց նաև, որ վարորդները խնդիրներ են ունենում նաև Վրաստանում. սահմանի աշխատակիցն անհատական մոտեցում է ցուցաբերում փոխադրողների հանդեպ. «Մեկն ասում է՝ բերեք, պոչտա արեք, որը վճարովի ծառայություն է, արժե 180 դոլար, այսինքն՝ կարող են քեզ ստիպել, ասել՝ 180 դոլար վճարիր, իրենք բեռն իրենց մեքենայով տեղափոխեն մի սահմանից մյուս սահման, իսկ մյուս հերթափոխը կարող է ուղղակի այդ նույն բեռը կնիքել ու ասել՝ բարի ճանապարհ»:
Ուղևորափոխադրողը նշում է՝ պարզապես պետք է հստակեցվի՝ որ տարբերակով են աշխատում ու բոլորի համար միևնույն տարբերակը գործի:
