Մինչ Փաշինյանը «քանդում է բարիկադները», հիասթափությունն ու խմորումներն ավելանում են․ ՔՊ-ից նոր ընդդիմությո՞ւն կծնվի (տեսանյութ)
Երեկ՝ հոկտեմբերի 16-ին, սյունեցիներն, ի նշան բողոքի, փակել են Գորիս-Կապան ճանապարհը։ Նրանք բողոքում են նախկին փոխոստիկանապետ Հունան Պողոսյանին Սյունիքի մարզպետ նշանակելու դեմ:
Ֆեյսբուքյան օգտատեր Վալերի Մանուչարյանն իր էջում տեղադրել է տեսանյութ, որտեղ պարզ երևում է, թե ինչպես են բնակիչները դժգոհում։
Մեկնաբանելով տեղի ունեցածը, արդեն այսօր՝ հոկտեմբերի 17-ին, վարչապետի ժամանակավոր պաշտոնակատար Նիկոլ Փաշինյանը նորմալ է համարել դժգոհությունները։ Ավելին՝ նա հայտարարել է, թե դրանք ո՛չ թե սյունեցիներն էին, այլ «Քաղաքացիական պայմանագիր» կուսակցության անդամները։
Արդյո՞ք ճանապարհը փակող տարեց մարդիկ ընդգրկված են ՔՊ-ում, դեռ պարզ կդառնա։ Այստեղ խնդիրն ավելի շատ այն է, որ Փաշինյանն ինքը չի հերքում, որ իր կուսակցության անդամները, փաստորեն, դուրս են եկել իր իսկ որոշման դեմ։
Նա լրագողների հետ զրույցում այդ մասին նույնիսկ ծիծաղելով ասաց․ «Սյունեցիները չեն՝ «Քաղաքացիական պայմանագրի» անդամներն են․․․»։
Ամեն դեպքում, պետք է հաշվի նստել իրողության հետ, որ Փաշինյանի վկայակոչած ժողովրդի մի մեծ զանգված այնքան էլ գոհ չէ նրա մի շարք նշանակումներից։ Մի մասն ինքն իրեն վստահեցնում է, մյուսներին՝ համոզում, թե Փաշինյանը գիտի՝ ինչ է անում։ Իսկ հասարակության մի հոծ զանգված էլ արդեն խոստովանում է, որ հիասթափված է։
Փաշինյանի լայվերն նախկինի պես այևս սպասված չեն, ու օգտատերերն էլ նախկին հիացմունքով չեն արտահայտվում նրա քայի մլերի մասին։ Օրինակ այսօր, երբ Փաշինյանը քայլում էր Հյուսիսային պողոտայով, նրա հետևորդներից ոմանք արդեն անվստահություն էին հայտնում, արդեն վարչապետի պաշտոնակատար դարձած Փաշինյանի նկատմամբ։
Մասնավորապես՝ Մանե Ման-յանը գրում էր․ «Հեղափոխությունը ժողովրդով, իշխանությունը՝ կոռումպացված ուժերի կադրերով: Կներեք՝ ես այլևս չեմ վստահում նրան, էս մարդու խելքով՝ ռեժիմի կեղտերն անփոխարինելի են։ Մենք սպասում էինք, որ էդ կեղտերը նստեն մեղադրյալի աթոռին, բայց հակառակ դրան՝ պաշտոններ են ստանում»։
Մեկ այլ օգտատեր էլ գրել է, որ նման տարբերակով նաև նախկին նախագահ Սերժ Սարգսյանն էր աշխատում։ «Սերժն էր իր շուրջը հավաքել նման մարդկանց, և ստացվեց ռեժիմը։ Ումից ինչ եք պահանջում․ զարմանում եմ ձեր վրա (նկատի ունի Փաշինյանին հավատացողներին-հեղ․), չե՞ք տեսնում՝ ինչպիսի մարդիկ են պաշտոններ ստանում՝ մեղադրյալի աթոռին նստելու փոխարեն․․․ կամ բռնում զալոգով թողնում ա։ Չեմ հավատում էլ․․․»։
Կային էլի նման համատեքստով շատ ուրիշ մեկնաբանություններ, սակայն, եթե իրեն ընտրած ժողովրդին Փաշինյանը կարող է համոզել, վստահեցնել, հավատացնել ու անցնել-գնալ, ապա նույնը չի կարող կուսակիցների նկատմամբ կիրառել։ Ամենաշատը դժգոհողների բերանները կարող է փակել նրանց պաշտոններ նետելով, որը խնդիրն ավելի կբարդացնի, քանի որ միայն «հու-հու գըմփ» անելը քիչ է պաշտոն զբաղեցնելու և ճիշտ ու մասնագիտորեն կառվարելու համար։
Ամեն դեպքում, մինչ Փաշինյանը «քանդում է բարիկադները», ներկուսակցական խմորումներն ավելանում են։ Այս առումով չի բացառվում, որ ՔՊ-ից ծնվի նոր ընդդիմություն, ինչպես ժամանակին ՀՀՇ-ն ծնեց ԱԺՄ-ն (Ազգային ժողովրդավարական միությունը), որը դարձավ ընդդիմություն։
Արմինե Մկրտումյան
