Երիտասարդ գործարարը զգուշացնում է՝ կվերցնեմ ծանր շինտեխնիկա ու կփորեմ բոլոր փողոցները, որտեղ ձեր բիզնեսներն են (տեսանյութ)
Գյումրեցի գործարար Միշա Պողոսյանը ֆեյսբուքյան տեսաուղերձով դիմել է Շիրակի մարզպետին ու փոխմարզպետին՝ լուծելու իր խնդիրը: Բանն այն է, որ նրա հիմնած սննդի սպասարկման կետի դիմացի հատվածում փողոցը քանդել են՝ շինարարություն իրականացնելու նպատակով, ընդ որում՝ առանց տեղյակ պահելու: 10-րդ օրն է՝ հակահիգիենիկ վիճակի պատճառով, կառույցը չի աշխատում, և գործարարը կանգնած է մի շարք վճարումներ անելու խնդրի առաջ, իսկ եկամուտ, փաստորեն, չունի: Պողոսյանը վրդովված է և հիասթափված քաղաքապետարանից ու քաղաքապետից ու տեսաուղերձն ամենևին էլ վերջիններիս չի ուղղում: Գործարարի հիմնած սննդի սպասարկման կետը գտնվում է Գյումրիի կենտրոնական հրապարակին հարող տարածքում, և ճանապարհի շինարարությունը դեռ չեն վերջացրել, իսկ Բալասանյան ընտանիքին պատկանող «Գյումրի» գարեջրատարան դիմացի շինարարությունը շատ արագ վերջացրել են, ընդ որում՝ այդ փողոցն այդքան էլ բանուկ չէ:
Դիմելով մարզպետին էլ՝ գործարարը հարցնում է՝ որտեղի՞ց պետք է մոտ 800 հազար դրամ վճարում անի: Նա նշում է, որ պարբերաբար կոչեր են արվում հանդուրժող լինելու, սակայն ի՞նչ անի ինքը, եթե հարկայինը և բանկերը հանդուրժող չեն: Երիտասարդ գործարարը նշում է, որ 3 օրվա մեջ հարցին լուծում չստանալու դեպքում՝ Պողոսյանը ստիպված կլինի դատարան դիմել:
Ներկայացնում ենք նաև նրա ֆեյսբուքյան գրառումը.
«Օգնության կոչ
Հարգարժան մարզպետ՝ Կարեն Սարուխանյան, փոխմարզպետ՝ Սոֆյա Հովսեփյան, հարգարժան կառավարության ներկայացուցիչներ, ակնկալում եմ Ձեր աջակցությունը։ Շինարարության սկսվելուց մինչև այս պահը, ոչ մեկ չի ծանուցել, չի տեղեկացրել ու չի նախազգուշացրել նման գործողությունների մասին։
Իսկ բոլոր նրանք, ովքեր զանգեն՝ օգնության փոխարեն, սկսեն խրատներ տալ, փորձեն վախեցնել, զգուշացնում եմ, չանեք նման բան, իրոք խորհուրդ եմ տալիս չանել։
Սիրելի ընկերներ ջան, օգնեք տարածենք կոչս, որպեսզի հասնի իր նպատակին»։
