Կալանավորներին թղթեր են բաժանել. սրտատրոփ սպասում են

Արտահերթ խորհրդարանական ընտրություններին ընդառաջ` Նիկոլ Փաշինյանի կառավարությունը շրջանառության մեջ դրեց համաներման մասին օրենքի նախաիիծ՝ այն դարձնելով թեժ քննարկումների առարկա:

Կառավարության նիստերից մեկի ժամանակ Արդարադատության այն ժամանակվա նախարար, ներկայիս նախարարի պաշտոնակատար Արտակ Զեյնալյանն ասաց, որ այս փուլում մշակվում է օրենքի նախագիծ՝ երկրում համաներում հայտարարելու համար:

Արդյոք այս համաներումը կլինի ընդգրկո՞ւն համաներում, թե՞ հայտարարվելիք համաներման արդյունքում դրանից կօգտվեն մի խումբ կալանավորներ՝ ցույց կտա ժամանակը, սակայն մինչ այդ ժամանակի գալն արդեն իսկ շրջանառվում են որոշ մարդկանց անուններ, որոնք պետք է օգտվեն պետության կողմից տրվող այս հնարավորությունից:

Ամենաշատը քննարկվում է Շանթ Հարությունյանի անունը, ով դեռ ամիսներ առաջ է հայտարարել, որ չի ցանկանում համաներմամբ դուրս գալ կալանավայրից:

Արդյո՞ք Շանթը կկարողանա պահել խոստումը և չօգտվել իրեն տրված համաներման իրավունքից՝ դարձյալ ցույց կտա ժամանակը:

Մեկ կարևոր դիտարկում ևս՝ թեև Արդարադատության նախարարությունը համաներման վերաբերյալ օրենքի նախագիծը դեռ չի հանրայնացրել՝ այն հասանելի չէ իրավապաշտպան ՀԿ-ներին, չկա նաև նախագծի ամբողջական տարբերակը, սակայն հայաստանյան կալանավայրերի բնակիչներին արդեն իսկ բաժանվել են թղթիկներ, որոնց վրա հանգամանալից շարադրված է՝ ինչ է համաներումը և ովքեր կկարողանան օգտվել այդ հնարավորությունից՝ ըստ էության՝ այդ թղթիկները ստացած կալանավորներին պահելով գերլարված վիճակում:

Հետաքրքրական է՝ ի՞նչ նպատասկ է հետապնդում Կառավարությունը՝ համաներում հայտարարելով. կալանավայրերը բեռնաթափելո՞ւ, թե՞ արտահերթ խորհրդարանական ընտրությունների ժամանակ հավելյալ ձայներ հավաքելու:

Սա ևս ցույց կտա ժամանակը, երբ հայտնի դառնան համաներմամբ ազատության մեջ հայտնվողների ցուցակները:

NEWSPRESS.am