«Ա՛յ մարդ, էդ գյուղապետից պրծում չկա՞»․ վաղաշենցիները փաստեր են ներկայացրել , բայց գործին ընթացք չեն տալիս (տեսանյութ)
Գեղարքունիքի մարզի Վաղաշեն գյուղի բնակիչները շարունակում են ահազանգել գյուղի խնդիրների մասին ու պահանջել համայնքի ղեկավար Արթուր Սուվարյանի հրաժարականը:
NEWSPRESS.am-ն արդեն անդրադարձել է բնակիչների ահազանգին առ այն, որ գյուղապետն իրեն շրջապատել է իր հարազատներով և արդեն 13 տարի գումարներ է մսխում։
Համայնքապետարանի աշխատակից Պարգև Ալեքսանյանը մեզ հետ զրույցում, ինչպես նախկինում, այս անգամ ևս պնդեց, որ ունի փաստեր այն մասին, թե ինչ ճանապարհով է գյուղապետը մսխել ջրագծի գումարները:
Ճիշտ է՝ Արթուր Սուվարյանի պաշտոնավարման ընթացքում Վաղաշենում և հարևան համայնքներում զանազան ջրագծեր են անցկացվել, սակայն դրանք եղել են անորակ: Զարմանալի զուգադիպությամբ, ջրագիծ անցկացնելու համար հայտարարված մրցույթում մշտապես հաղթել է «Սուվարյան շին» ՍՊԸ-ն, որը պատկանում է Սուվարյանների ընտանիքին:
Պարգև Ալեքսանյանը վստահեցնում է, որ դեռ այն ժամանակ նրան կողքից հորդորել են գումարները գոնե այդչափ չմսխել:
«Ուզում էր ուտի, թող ուտեր, բայց ենթադրենք՝ հատկացրել են 1,5 մլրդ դրամ, էն կեսը թող ուտեր, 1 մլրդ-ն էլ դներ գործի մեջ, բայց ախր ամբողջությամբ էր ուտում էդ փողերը: Էսօր մենք ջրագիծ չունենք: Ջուրը հելել, գնում ա»,-մեզ հետ զրույցում նեղսրտած ասաց Պարգև Ալեքսանյանը:
Մեկ այլ վաղաշենցի էլ պնդեց, որ արդեն 13 տարի կրակն են ընկել գյուղապետի ձեռքին: «Պարգևը մեր լիազորված անձն ա, աղջիկ ջան, ինչ ասում ա, համամիտ ենք, բայց եթե ուզում եք՝ մենք էլ կասենք ու կհաստատենք, որ մենք էդ գյուղապետին չենք ուզում, սաղ կերավ-պրծավ, մեզ էլ հետը. ա՛յ մարդ, դրա ձեռքից պրծում չկա՞»,- ասաց գյուղացին:
Պարգև Ալեքսանյանը վստահեցնում է, որ Արթուր Սուվարյանի դեմ փաստերը շատ են: Նա դրանք ներկայացրել է Ազգային անվտանգության ծառայությանն ու նաև ՀՀ քննչական կոմիտեի Գեղարքունիքի մարզային քննչական վարչության Մարտունու քննչական բաժին, բայց գործին ընթացք չեն տվել:
«Հունիսի 4-ին փակեցինք Մարտունի-Երևան ճանապարհը՝ չօգնեց: Ստիպված՝ հուլիսի 4-ին 14 կետից բաղկացած հաղորդում եմ տվել: Դրանից մեկ ամիս հետո, Մարտունու բաժանմունքից նոր ինձ կանչել են, բայց գործին ընթացք տալու փոխարեն՝ նորից ուզեցին տամ էդ հայտարարությունը. ստիպված նորից տվեցի, բայց դեռ ընթացք չեն տվել»,- ասում է Պարգև Ալեքսանյանը:
Նա նկատում է, որ խնդիրն ամենայն մանրամասնորեն է ներկայացրել իրավապահներին. պատմել է՝ ինչպես է գյուղապետը գումարներ յուրացրել, ում է վաճառել ջրագիծը և ինչու մինչև այսօր ջրագիծը վերանորոգված չէ, բայց, միևնույնն է, սայլը տեղից չի շարժվել։
«Ասում եմ՝ լավ, ինձ խփել են, էդ հեչ, մեքենաս ջարդել են, դա էլ հեչ, բա էդ փողերի լվացման գործն ինչո՞ւ չես ուղարկում դատարան, տվել եմ տվյալները՝ հուշարձանի համար 30 տոննա ցեմենտ է գրել, բայց ամենաշատը 3 տոննա է օգտագործել, իսկ ոռոգման ջրի ջրագծի վերանորոգման համար մի մեքենա ավազը 200 հազար դրամ է ձևակերպել, ո՞վ է տեսել տենց բան, ամենաշատը 80 հազար դրամով կարող էր բերել, ասում ա՝ Սևանից եմ բերել, ախր ես էդտեղ կանգնած եմ եղել, նախ էդքան ավազ չի եղել և հետո էլ, ո՞վ էր իրեն ասում՝ գնա, Սևանից բերի, ավելի որակով ավազ ավելի մատչելի գնով կարող էր բերել։ Մարտունու բաժանմունքի պետ Արթուր Ավագյանին եմ ասում էդքանը, ասում է՝ փորձագիտական ուսումնասիրություն դեռ չի եղել։ Բա արեք, 4 ամիս առաջ եմ տվել հայտարարությունը»,- ասում է Պարգև Ալեքսանյանը։
Նա նաև հավելում է, որ գյուղապետ Արթուր Սուվարյանը 45 մլն դրամի տեխնիկա է ձեռք բերել, որն այսօր անհետացել է։ Ալեքսանյանը համոզված է և վստահեցնում է, որ եթե Մարտունու քննչական բաժնի պետ Արթուր Ավագյանն այդքան բանից հետո իր տված հայտարարությանն ընթացք չի տալիս, ապա նշանակում է՝ պաշտպանում է գյուղապետին։
«Քննչական բաժնին էնպես է կաշառել, որ մինչև օրս չեն բացահայտում․․․ բայց ճանապարհ փակելով էլ հարց չի լուծվի․ մարդ ա՝ իր գործին ա գնում, իր ճամփան փակենք, թե իրավապահը գործ չի՞ անում»,-նկատում է մեր զրուցակից Ալեքսանյանը։
Նա ևս մեկ անգամ պատկան մարմիններրի ուշադրությունն է հրավիրում խնդրին, քանի որ դա ոչ միայն իր, այլև ողջ գյուղի խնդիրն է, ովքեր իրականում ուզում են ազատվել գյուղապետից։
Զրուցեց՝ Արմինե Մկրտումյանը
