Սերժ Սարգսյանի և Նիկոլ Փաշինյանի տարբերությունը․ 1050 ընտանիք կանգնել է փաստի առաջ

«Վերածնունդ» երիտասարդական ավանի կառուցմանը սպասող 1050 շահառուներ շաբաթ օրվանից կանգնել են փաստի առաջ։

Հայտնի է դարձել, որ «Վերածնունդ» երիտասարդական ավանի բնակարանների շահառուներին հիփոթեքային վարկեր հնարավոր է տրամադրել միայն «Երիտասարդ ընտանիքին` մատչելի բնակարան» պետական նպատակային ծրագրի շրջանակում:

Ծրագիրն իրականացնող ԵՊՀ շրջանավարտների միավորումը հայտարարություն էր տարածել այն մասին, որ «Վերածնունդ» երիտասարդական ավանի հիփոթեքային վարկավորումն իրականացվելու է «Երիտասարդ ընտանիքին` մատչելի բնակարան» պետական նպատակային ծրագրի միջոցով: Այսինքն՝ այն չի տարածվելու երիտասարդ մասնագետների վրա:

Երիտասարդ ընտանիքին` մատչելի բնակարան» ծրագրով բնակարան ձեռք բերելու համար շահառուն պետք է 10 տոկոս կանխավճար տրամադրի, եթե երկրորդային գույք է գրավադրվում: Եթե գույք չի գրավադրվում, ապա հիփոթեքային վարկը տրամադրվում է գույքի արժեքի 20 տոկոսի չափով կանխավճարի առկայության դեպքում:

Ծրագրի շահառու կարող են լինել այն երիտասարդ ընտանիքները, որ ամուսիններից առնվազն մեկը երիտասարդ է, իսկ մյուսի տարիքը չի գերազանցում 35-ը, և ամուսինների գումարային տարիքը չի գերազանցում 70-ը կամ երիտասարդ միայնակ ծնողը, ում տարիքը չի գերազանցում 35-ը:

Այս պայմանների արդյունքում մեկ տարուց ավել ծրագրի մեկնարկին սպասող տասնյակ երիտասարդ մասնագետներ պարզապես կզրկվեն բնակարան ձեռք բերելու փայփայած հույսից, մյուս կողմից՝ արված հայտարարությունը վկայում է այս ծրագրով նախորդ տարիներին բնակարան ձեռք բերած մասնագետների և դրանց սպասողների միջև անհավասար մրցակցային պայմանների մասին։

Խնդրին այսօր անդրադարձել է ՀՀ վարչապետ Նիկոլ Փաշինյանը և խորհուրդ տվել չվրդովվել․

«Խնդիրը կուսումնասիրենք, եթե պարզվի անարդար մոտեցում կա, ապա կշտկենք»,-ասել է վարչապետը։

Թե ինչ կերպ է այդ շտկումը կատարվելու՝ դեռ հայտնի չէ. հավանաբար, վարչապետը դրան կանդրադառնա ֆեյսբուքյան լայվի միջոցով, իսկ մինչ այդ՝ նշենք, որ Կենտրոնական բանկը հաստատել է, որ մերժել է երիտասարդ ընտանիքիներին մատչելի բնակարան ձեռք բերելու համար վարկային պորտֆելի հատկացումը՝ չբերելով դրա համար անհրաժեշտ հիմնավորումները։

Հուսանք՝ խնդիրը կլուծվի և հերթը չի հասնի բնակարան ձեռ բերելու հւյսով սպասող մասնագետների կողմից բողոքի ակցիաների կազմակերպմանն ու ճանապարհներ փակելուն։

Վերջում հավելենք, որ մատչելի պայմաններով Սերժ Սարգսյանի նախագահության տաս տարիների ընթացքում ԵՊՀ շրջանավարտների միավորում ՀԿ-ի կողմից իրականացվել է 9 բնակարանաշինական ծրագիր։ Բնակարան է կարողացել ձեռք բերել 2300 շահառու։

Հիմա հարց է առաջանում, թե Նիկոլ Փաշինյանի կառավարման տարիներին քանի՞ շահառու կկարողանա բնակարան ձեռք բերել այնպիսի մատչելի վարկային պայմաններով, որը գործել է նրա նախորդի ժամանակ։

NEWSPRESS.am