Ովքե՞ր էին երեկվա «ավանտյուրայի» հեղինակները. երեկվա նիստը ՀՀԿ-ն չտապալեց

Հանկարծ չթվա, թե հարցս չի վերբերում օրակարգին: Այսպես սկսեց իր ելույթը «Ծառուկյան» դաշինք խմբակցության պատգամավոր Տիգրան Ուրիխանյանն ԱԺ-ում ընթացող նիստի ժամանակ՝ անդրադառնալով երեկվա՝ հոկտեմբերի 22-ի նիստում տեղի ունեցած՝ Ընտրական օրենսգրքի քվեարկության տապալմանը:

Նա երեկվա նիստը որակեց որպես «ավանտյուրա», որով փորձ է արվում մերժված ՀՀԿ-ին նորից վերադարձնել Ազգային ժողով:

«Երեկվա տեղի ունեցած ավանտյուրայից հետո, ԱԺ-ն պետք է իր բոլոր հնարավորությունները գործադրեր, ավելի շատ նկատի ունեմ Հանրապետական խմբակցությանը, որպեսզի արագացված տեմպերով, իր մեղքերը քավելու համար, բերի և ԸՕ-ն անցկացնի: Այն, ինչ երեկ տեղի ունեցավ, դա հնարավորություն է ՀՀԿ-ի համար, թեկուզ և փոքր քանակով, բայց մտնել ԱԺ»,- նկատեց Ուրիխանյանը:

Նա չի բացառում, որ ռեյտինգային կարգով ՀՀԿ-ն կարող է վերականգնել իր տեղն ԱԺ-ում, որի դեմը, ըստ Ուրիխանյանի, պետք է առնել:

Արձագանքելով նրա կարծիքին՝ ԱԺ նախագահ Արա Բաբլոյանն ասաց. «Պարո՛ն Ուրիխանյան, հիմա Դուք ցանկանում եք, որ ես իրականությո՞ւնն ասեմ, շատ լավ, էդ դեպքում բոլորը թող գնահատեն, այդ թվում նաև՝ ժողովուրդը, թե որտեղ է ավանտյուրան»:

Նա նկատեց, որ հնարավորություն է տվել բոլոր ուժերին պատշաճ մասնակցել օրենսգրքի քննարկմանը և քվեարկությանը, սակայն հարցի լուծման համար իրենց աջակցությունը հայտնած 69 պատգամավորից մասնակցել են ընդամենը 57-ը, այսինքն՝ խոստացել են, բայց չեն եկել և քվորում չեն ապահովել: Սա այն դեպքում, երբ Բաբլոյանը հավելյալ ժամանակ է տվել պատգամավորներին՝ հավաքվելու համար:

«Այս առումով միայն ՀՀԿ-ն է ազնիվ գտնվել. հայտարարեցինք, որ չենք մասնակցելու և չմասնակցեցինք, մյուսներն ասել էին, որ կողմ են քվեարկելու, 69 պատգամավոր հայտարարեց, որ կաջակցի, բայց ընդամենը 57-ը եկավ: Եթե ուզում եք քննադատել՝ քննադատեք, բայց ազնիվ եղեք»,-նկատեց Բաբլոյանը՝ հավելելով, որ, եթե ուզում են՝ թող գան և քվեարկեն: