Նախորդների պես՝ «մեր դեմ խաղ չկա» ասելով ու «շեֆի ընկերը» լինելով, «քարուքանդ» են լինում. Թորոսյանի ընկերը խփել է իր աշխատակցուհուն (տեսանյութ)

«... ես կարող եմ իմ անունից ասել, որ մենք իշխանության մաս ենք կազմում ընդամենը երկրում դրական փոփոխություններ անելու համար և ոչ թե ինչ-որ բան գտնելու կամ կորցնելու։ Մեզ այլ բան կառավարությունում չի պահում պարզապես»։

Այս խոսքերը մի առիթով հնչեցրել է ո՛չ ավել, ո՛չ պակաս, ՀՀ առողջապահության նախարարի ԺՊ Արսեն Թորոսյանը: 

Սա, իհարկե, ծափողջույնների արժանի հայտարարություն է, եթե չնայենք նաև մեդալի մյուս կողմը: Իրականում այս ոլորտի «դրական փոփոխությունները» միայն Արսեն Թորոսյանին ու նրա մերձավորներին են տեսանելի. նրանց համար, ինչպես ասում են, «կանաչ լույս է վառվել», քանի որ մեկը մյուսի հետևից, Թորոսյանի թեթև ձեռքով պաշտոն են ստանում: Ու այնպիսի տպավորություն է, որ հենց այս հարցերն են Թորոսյանին «կառավարությունում պահում»:

Հոգեկան առողջության պահպանման ազգային կենտրոնի նորանշանակ տնօրեն Նարեկ Վանեսյանն, օրինակ, այս պաշտոնը զբաղեցրել է միայն այն բանի համար, որ Թորոսյանի ընկերն է:

Իր նշանակման օրից 35-ամյա այս երիտասարդը միայն լարվածություն է առաջացրել ու հայտնվել սկանդալների կենտրոնում: Մամուլում շրջանառվող լուրերի համաձայն՝ հենց երեկ էլ նա Երևանի Մխիթար Հերացու անվան պետական բժշկական համալսարանում (ԵՊԲՀ) սկանդալ է սարքել:

Նրա ցինիզմը հասել է այն աստիճանի, որ պրոֆեսորադասախոսական անձնակազմի հանդարտեցման կոչերին ի պատասխան՝ ասել է, թե «մեր դեմ խաղ չկա, նախարարն իմ ընկերն է, ինչ անում եմ, լավ եմ անում»:

Նրա ամենաթողությունից վրդովված դասախոսները և ուսանողները նամակ են ուղղել նախարարին, որպեսզի վերջինս տեր կանգնի իրավիճակին:

Արսեն Թորոսյանն արձագանքելով նամակին՝ ֆեյսբուքյան իր էջում գրել է.

Դեռ կերևա, թե Թորոսյանն ինչպես կպարզի «բարձրացված հարցի հանգամանքերը», ու արդյոք կսանձի՞ իր ընկերոջը, թե կհավատա նրա «արդարացումներին»... չի բացառվում, որ Նարեկ Վանեսյանը կամ հերքի տեղի ունեցածը, կամ արդարացնի իր պահվածքը, եթե իհարկե չկան ձայնագրություններ կամ տեսագրություններ:

Մյուս կողմից էլ՝ թերևս նույնիսկ տեսագրության դեպքում չի բացառվում, որ Թորոսյանը հանուն իր ընկերոջ «դրական փոփոխության ու բարօրության» ձայն չհանի ու աչք փակի կատարվածի վրա, ինչպես դա եղավ սրանից մոտ 2 ամիս առաջ:

Տեսանյութում երևում է, թե ինչպես է Վանեսյանն անհարգալից վերաբերմունք ցուցաբերում իր աշխատողների նկատմամբ, նա ոչ միայն գոռում է աշխատողների վրա, այլև հարվածում աշխատակցուհու դեմքին ու բրթբրթում նրան: Այս տեսանյութը համացանցում հայտնվել է դեռ օգոստոսի 29-ին, սակայն մեր «ամենահումանիտար» նախարարը մատը մատին չի տվել «հանգամանքները պարզելու» և իր արարքի համար Վանեսյանին անձամբ «թաթալոշելու» համար:

Եթե Թորոսյանը կասի, թե չի տեսել այդ տեսանյութը, ապա դա խոսում է ոլորտի նկատմամբ ունեցած նրա անտարբերության մասին, քանի որ տեսանյութը երկու ամիս է՝ արդեն պտտվում է համացանցում, և հնարավոր չէր, որ դա անցներ իր քթի տակով՝ աննկատ մնալով: Հատկապես որ Ֆեյսբուքի սիրահար նոր իշխանության այս ներկայացուցիչը միշտ առցանց է:

Իսկ եթե տեսել է, բայց չի արձագանքել, ապա դա ավելի վատ է, քանի որ նա անարդար է իր իսկ ղեկավարած համակարգի նկատմամբ: Արդար կլիներ այն ժամանակ, երբ Թորոսյանը մի կողմ դներ ընկեր-բարեկամ-մերձավոր հասկացողությունները և կարողանար լիարժեք պատժել կարգազանցներին:

Թորոսյանն իր ընկեր Նարեկի համար ավելի լավ գործ արած կլիներ, եթե նրան ոչ թե նշանակեր Հոգեկան առողջության պահպանման ազգային կենտրոնի տնօրեն, այլ հոգեկան առողջությունը բուժելու համար գրանցեր նրան այդ կենտրոնում: Քանի որ միայն հոգեկան խնդիրներ ունեցող ու անառողջ մարդը կարող է աշխատողի, այն էլ կին աշխատողի վրա գոռալ ու ձեռք բարձրացնել:

Ինչո՞վ եք տարբերվում դուք նախորդներից, եթե «մեր դեմ խաղ չկա»-ն դարձրել եք կարգախոս,ու շեֆը ձեր ընկերն է... Ինչպես կասեր վարչապետի ԺՊ Նիկոլ Փաշինյանը՝ ձեր նմաններն են «քարուքանդ լինում»՝  քարուքանդ անելով երկիրը...

Արմինե Մկրտումյան