«Իսկ ո՞վ ասեց, որ թույլ ենք տալիս ներկրեն». նախարարը վերահաստատեց՝ նախարարությունը «տկար է»

Որևէ մեկը որևէ մեկի վրա «չի գցում». օրենքն է արգելում աջ ղեկով մեքենաների ներկրումը: Այդ մասին այսօր կառավարության նիստից հետո լրագրողների հետ ճեպազրույցում ասաց Տրանապորտի, կապի և տեղեկատվական տեխնոլոգիաների նախարար Հակոբ Արշակյանը՝ անդրադառնալով աղմկահարույց օրենքին, որի հետևանքով տասնյակ ներկրողներ՝ իրենց1000-ից ավելի մեքենաներով, կանգնել են փաստի առաջ: 

«Հարցը ԵՏՄ տիրույթում չէ: Հայաստանի Հանրապետության օրենքների տիրույթում է և այդ օրենքն ընդունվել է ԱԺ-ի կողմից»,- ասաց Արշակյանն՝ ի պատասխան լրագրողի հարցի, թե արդյոք հնարավոր չէ՞ , ԵԱՏՄ-ի հետ քննարկումների արդյունքում, թեկուզ  բացառության կարգով, թողնել չեզոք գոտում կայանված մեքենաների ներկրումը:

Նախարարը նշեց, որ հանդիպումների շարք է նախատեսվում այն մարդկանց հետ, ովքեր առաջարկում են օրենքը փոխել. «Ես այսօր իմացա, որ իրենց պահանջը հստակեցրել են և ասում են, որ առաջարկում են, որ աջ ղեկի ներմուծումն ուղղակի թույլատրվի և վերջ: Այդ առումով վաղվանից սկսելու են քննարկումներ»:

Հարցին էլ, թե անընդհատ ասվում է, որ ճանապարհները ձախակողմյան երթևեկության համար են նախատեսված, հիմա եթե թույլ է տրվում աջակողմյան մեքենաների ներկրումը, ճանապարհները հարմարեցված են դառնում, նախարարը պատասխանեց. «Իսկ ո՞վ ասեց, որ թույլ ենք տալիս կամ հարմարեցված են: Ես ասում եմ, որ տեղի ունենալու քննարկումներ»,- նշեց նա:

«Սկզբնական օրենսդրական նախագծում եղել է հետևյալը, որ նրանք, ովքեր ունեն աջակողմյան ղեկով մեքենաներ ՀՀ-ում գրանցված, չեն կարող վերավաճառք կատարել, այսինքն՝ օտարել իրենց գույքը, և դրա շուրջ ծագել էր դիմադրություն: Այդ դիմադրության անդամներից մեկն էլ ես եմ եղել, այսինքն՝ ես համաձայն չեմ եղել այդ օրենքի նախագծին: Այդ օրենքի դրույթների մեջ նաև եղել է կետ, որ մինչև հոկտեմբերի 1-ն արգելք է դրված եղել: Մաքսային միության պայմանագրում կա հետևյալ կետը, որ լոկալ երկրները կարող են սահմանափակումներ մտցնել 6ամսից ոչ ավելի, եթե դա հակասում է միջազգային այդ պայմանագրին: Սակայն այնտեղ կա նաև կետ, որ դա չի վերաբերում տեխնիկական սահմանափակումներին, այդ թվում՝ աջ ղեկի: Այսինքն՝ սկզբում որոշել են, որ 6 ամիսը մեկ կարգելեն, հետո տեսել են, որ այդ սահմանափակումը տեխնիկականին չի վերաբերում և հանել են ժամկետը: Դա տեղի է ունեցել ԱԺ մտնելու ժամանակ: Բայց մինչև այդ այն արգելքները, ըստ որոնց՝ մարդը չի կարող իր գույքն օտարել, հանված է եղել, և շարժման մասնակիցները, այդ թվում՝ ես, մեծապես բավարարված ենք եղել»,- ասաց նախարարը:

Արշակյանը մի քանի անգամ շեշտեց, որ օրենքն արգելում է ներկրումը՝ որպես տրանսպորտային միջոց, իսկ բողոքի ակցիան իրականացնողները ոչ թե «քաղաքացիներ չեն, այլ բիզնեսմեններ»: Նա հարցրեց լրագրողներին, թե ի՞նչ կանեն իրենք, եթե ինքը, ասենք, լինելով բիզնեսմեն, 100 մեքենա բերի ու փորձի ներկրել, սակայն օրենքը դա թույլ չտա: 

Ի դեպ, Արշակյանը նշեց նաև, որ մեքենաները կարող են բերել որպես ոչ տրանսպորտային միջոց, այլ, օրինակ, որպես պահեստամաս: Լրագրողի հարցին, թե բերեն՝ ի՞նչ անեն, պատասխանեց. «Լավ, ժողովուրդ, ես լուծում չեմ տալու հարցին, թե բերի՝ ինչ անի: Բերել ա, որպես տրանսպորտային միջոց՝ արգելվում է ներմուծելը»:

Դիտարկմանն էլ, թե հնարավոր չէ՞ թույլ տալ մեքենաները ներկրել ու հետո ղեկը տեղափոխվել ձախ, նախարարն ասաց, որ դա ռիսկային է անվտանգության տեսակետից, և ինքը նման խորհուրդ տալ չի կարող: 

Նկատենք միայն, որ նախարարն այդպես էլ չասաց, թե ինչ քննարկումներ են ընթանալու ներկրողների հետ, եթե նախարարը խուսափում է օրենսդրական փոփոխություններ նախաձեռնելուց, իսկ թույլ տալ ներկրել, առավել ևս չի պատրաստվում: