Զինվորի հացը գողացած գեներալն ազատ կարձակվի․ Սաշիկի օրինակի ու Փաշինյանի վերջնագրի հետքերով

Հունիսի 16-ից կալանավորված գեներալ Մանվել Գրիգորյանը որոշել է ապաշխարհել և պետությունից թալանածը ետ վերադարձնել պետությանը։

Ինչպես հայտնում է Սիվիլնեթը, Մանվել Գրիգորյանի շահերի պաշտպան Լևոն Բաղդասարյանը դիմել է Կառավարությանը և հայտնել, որ Գրիգորյանը պատրաստ է պետությանը նվիրել Ակնալիճ համայնքում գտնվող «Ակնալճի կուղբաբուծական տնտեսություն» ընկերության շուրջ 330 հեկտար տարածքը, որն արժե ավելի քան 10.5 մլն դոլար։

Բնականաբար, Կառավարությունը չի կարող հրաժարվել նման խոշոր կարողութունը պետությանը վերադարձնելու՝ իրեն մատուցված հնարավորությունից։

Թե ինչի դիմաց է Մանվել Գրիգորյանը որոշել վերադարձնել պետությունից թալանածը, պարզ կդառնա շատ կարճ ժամանակ անց, երբ նրա փաստաբաները կսկեն կրկին բարձրաձայնել Գրիգորյանի առողջական վիճակի ծանրությունն ու կալանքի հետ անհամատեղելիությունը։

Կրկին կակտիվանան այս թեմայով հրավիրվելիք մամուլի ասուլիսներն ու հարցազրույցների տեղատարափը։

Բայց մինչ այդ՝ ընթերցողի ուշադրությունն ուզում ենք հրավիրել մեկ այլ կարևոր հանգամանքի վրա։

Ինչո՞ւ է Մանվել Գրիգորյանի մոտ նման ցանկություն առաջացել հոկտեմբերի 21-ին կայացած ՏԻՄ ընտրություններից և Էջմիածնի քաղաքապետի ընտրությունից հետո։

Ինչո՞ւ կալանավորված գեներալների պաշտպանները նման նախաձեռնություն Կառավարությանը չներկայացրեցին Էջմիածնի ընտրություններից առաջ, կամ ինչո՞ւ որոշվեց այդ լուրը մամուլի միջոցով տարածել հիմա։

Սրանք հարցեր են, որոնց պատասխանները կբացեն փակագծերն ու հնարավոր պայմանավորվածությունները։

Արդեն տևական ժամանակ է, ինչ մամուլը գրում է, որ Մանվել Գրիգորյանն ազատ կարձակվի Էջմիածնի ընտրություններից հետո, քանի որ այդպես է եղել ի սկզբանե պայմանավորվածութունը։

Փաստորեն, հիմա գալիս է դրանց երկրորդ փուլն իրականություն դարձնելու ժամանակը, ինչին, վստահաբար, կհաջորդի բարաթում գրվածի վերջնական կատարումը, և երկիրը կեղեքած ու զինվորի հացը գողացած գեներալը կհայտնվի ազատության մեջ։

Վերջում հավելենք, որ Մանվել Գրիգորյանը, փաստորեն, ուշադիր հետևել է Նիկոլ Փաշինյանի վերջնագրին, որը նա սահմանեց ավագանու քարոզարշավներից մեկի ժամանակ՝ կոչ հնչեցնելով թալանածը վերադարձնել, ինչին առաջինն արձագանքեց Սերժ Սարգսյանի եղբայր Սաշիկ Սարգսյանը։

NEWSPRESS.am