Կարգին Հայկո, թքա՞ծ ունեք քաղաքի վրա, թե՞ միայն «փիառշիկներ» են պետք

Ամեն օր կարդում եմ լրահոսն ու մտածում` «լավ, մինչև ե՞րբ այսպես»:

Ո՞ւր ենք գնում մենք այս ուղին բռնած` հետքա՞յլ, թե՞ արդեն կործանում: Երկրի ղեկավարից սկսած` մինչև ամենահասարակ չինովնիկ, ապրում է միայն իր ու իր շրջապատի մասին մտածելով:

Ամեն մեկն իր ծանոթ- բարեկամին, ընկերոջն ու հարազատին տանում, կարգում է որևէ բարձր պաշտոնի` անունը դնում են «հեղափոխություն»: Ի՞նչ կապ ունի ժողովրդի համար, թե ով է կաբինետում նստած փողեր դիզում կամ շարիկ գլորում, չէ՞ որ կրկին նույն կատեգորիայի մարդիկ են իշխանության:

Մի կերպ հարմարվեցինք Փաշինյանի նշանակումներին, ժամանակ ենք տալիս՝ իրենք իրենցով հասկանան, թե որ կադրն իրեն ինչպես կարող է դրսևորել, իսկ հիմա եկել է սթրես ապրելու հաջորդ փուլը` Կարգին Հայկոն է սկսել իր դերասանական շրջապատին լցնել քաղաքապետարան` դե իսկ անունը նույնն է` «հեղափոխություն»:

Կարգին Հայկո, որքա՞ն եք պատրաստվում շոու-բիզնեսում դեռ չկշտացածներին բերել պետական ապարատ, հասկանո՞ւմ եք, որ նրանց փորձ է պետք, հմտություն, թե՞ թքած ունեք քաղաքի զարգացման վրա: Մտածե՞լ եք արդյոք Ձեր պրոդյուսերին պաշտոն տալուց առաջ, որ կարելի էր մի կայացած ինժեների կամ ճարտարապետի այդ պաշտոնը տալ, որ նրա տված խորհուրդն էլ միայն Ձեզ փիառելուն չվերաբերեր, թե՞ Երևանին միայն «փիառշիկներ» են պետք:

Հերիք է մտածեք միայն ձեր մասին, ձեր կարճ ուղեղով այս երկրից օտարում եք լավագույն մասնագետներին, ովքեր կարող էին ենթակառուցվածքներ զարգացնել, տրանսպորտի ու մետրոպոլիտենի հարց լուծել, ջրահեռացման կամ աղբահանության խնդիրները կարգավորել, հասկանալ, թե որտեղ և ինչպես պետք է ասֆալտապատում անել, հիմա Ձեր դերասան ու պրոդյուսեր տեղակալները դա կանե՞ն, թե՞ միայն լավ փիառ արշավներ կկազմակերպեն:

Վերանայեք Ձեր որոշումները, այլապես մեկ տարի հետո, Ձեզ իշխանության բերած նույն զանգվածը կհեռացնի իշխանությունից, որովհետև մարդիկ իսկապես փոփոխություն են ուզում:

Արիանա Հովսեփյան

NEWSPRESS.am-ի հիմնադիր-տնօրեն