Բայց ես ե՞րբ ասեցի, որ մասնակցելու եմ ընտրություններին. Սամվել Ալեքսանյան

Ես կնոպկեն շշկռվեցի: Կնոպկեն: Դեմ չեմ եղել, ձեռնպահ պետք ա սեղմեի, պրոստո սխալվա, մատս կպավ, էդ սեղմեցի: Այսօր Ազգային ժողովում լրագրողների հետ զրույցում ասաց Ազգային ժողովի Հանրապետական խմբակցության պատգամավոր Սամվել Ալեքսանյանը՝ անդրադառնալով վարչապետի ընտրության ժամանակ Նիկոլ Փաշինյանի թեկնածությանը իր դեմ քվեարկելուն:

«Ես չեմ ուզեցել Փաշինյանին վնաս տամ»,- ասաց Ալեքսանյանը:

Հարցին, թե տեսնո՞ւմ է իրեն հաջորդ Ազգային ժողովում, պատգամավորը նույն հարցն ուղղեց լրագրողին՝ դու տեսնո՞ւմ ես: 

Ալեքսանյանը կրկնեց իր կողմից բազմիցս արված արտահայտությունը, թե ինքը գործարար չէ: Նա ասաց դա ի պատասխան հարցի էլ, թե գործարարի ինչի՞ն է պետք պատգամավոր լինելը: 

Նա նշեց, որ շատ լավ է աշխատում ներկայիս կառավարության հետ, իսկ թե ավելի՞ լավ, քան նախո՞րդ կառավարության հետ, պատասխանեց. «Չէ, էդձև բաներ մի ասա ընձի»:

Հարցին, թե պատկերացնո՞ւմ է համագործակցություն «Քաղաքացիական պայմանագրի» հետ, ասաց. «Բայց ես ե՞րբ ասեցի, որ մասնակցելու եմ, որ հիմա էլ էդ հարցը տալիս ես ինձի: Երկու օր բան ա մնացել, թողեք հանգիստ մնամ էլի: Ի՞նչ եք ուզում ինձնից: Երկու օր ա մնացել ինձ»: