Այս համաներումն աննախադեպ չէ, ինչպես ներկայացվում է․ ում համար մարդասիրական ակտ՝ Զոհրաբյանի համար ամենօրյա աշխատանք

Եթե շատ պատգամավորների համար այս համաներման նախագիծը ընդամենը մարդասիրական ակտ է, ինձ համար ամենօրյա աշխատանք է։ Այսօր՝ հոկտեմբերի 31-ին, ԱԺ արտահերթ նիստում ասաց «Ծառուկյան» խմբակցության պատգամավոր Նաիրա Զոհրաբյանը՝ արձագանքելով դիտարկմանը, թե  «Էրեբունի-Երևան»-ի 2800 -ամյակին նվիրված համաներումը ո՛չ թե բանտերը բեռնաթափելու միտում է, այլ մարդասիրական ակտ։

Զոհրաբյանը նկատեց, որ ինքն այն եզակի պատգամավորներից է, ով ամենօրյա ռեժիմով կապի մեջ է ՀՀ գրեթե բոլոր կալանավայրերի հետ։ Պատգամավորն առաջիկայում պատրաստվում է ներկայացնել առաջարկների մեծ փաթեթ, որն ընդգրկելու է քրեակատարողական հիմնարկների խնդիրների լուծումներ։ Սակայն մինչ այդ, Նաիրա Զոհրաբյանը նկատեց, որ համաներման նախագծի մասին խոսել է և՛ դատապարտյալների, և՛ նրանց ծնողների ու հարազատների հետ։ Պատգամավորի դիտարկմամբ՝ այդ համաներումն աննախադեպ չէ, ինչպես ներկայացվում է։

«Ես հասկանում եմ, որ համաներումը չենք կարող տարածել ՀՀ բոլոր դատապարտյալների վրա, բայց չպետք է մոռանանք, որ վերջին համաներումը տեղի է ունեցել 2013թ-ին։ Այսինքն՝ 6 տարի համներում չի եղել, բոլորի ակնկալիքն այն էր, որ համաներումն ավելի շատ հոդվածներ պետք է ընդգրկեր»,- նկատեց Նաիրա Զոհրաբյանը։

Նա նկատեց, որ «Ծառուկյան» խմբակցությունը պնդելու է, որ այդ համաներման մեջ ընդգրկվեն իրենց նշած հոդվածները։ Այս առումով նա ընդգծեց ցմահ ազատազրկված դատապարտյալների համաներման հարցը, որը պարտադիր պետք է վերանայվի և որոշ հոդվածներ ու կետեր ընդգրկվեն։