Աբսուրդ է․ ցմահ դատապարտվածին վաղաժամկետ չեն ազատել, քանի որ նա բանաստեղծություն չի գրել

Հայաստանում կա 93 ցմահ ազատազրկված, որոնցից 16-ը 18-21 տարեկան հասակում են կատարել արարքը։ Այդ մասին ԱԺ արտահերթ նիստում հայտարարեց «Ծառուկյան» խմբակցության պատգամավոր Նաիրա Զոհրաբյանը։ Նա, համեմատականներ անցկացնելով, նկատեց, որ շատ երկրներում ցմահ դատապարտվում են 21 տարեկանից բարձր անձիք, իսկ Հայաստանում, ըստ պատգամավորի, անտրամաբանական մոտեցում է։ 

«Եթե 18 տարեկանից մեկ օր է պակաս, անձը կարող է դատապարտվել 10 տարի ազատազրկման, իսկ եթե 18 տարին լրացավ՝ ցմահ ազատազրկում են»,- ազատ Նաիրա Զոհրաբյանը։ Դիմելոց Արդարադատության նախարարին՝ նա նկատեց, որ միանշանակ պետք է անհատական մոտեցում ցուցաբերել խնդրին, հատկապես որ ցմահ դատապարտվածներից մոտ 15-ը ժամկետային զինծառայության շրջանում են դատապարտվել և դրանք բանակում կատարված արարքներ են։

«Լինենք մեր խղճի առաջ արդար. եթե սպան փորձել է անարգել զինվորին, ու նա սպանել է սպային, ու նման դեպքեր կան, երբ տվյալ հանցանքի համար տվել են 18-20 տարի, այժմ այդ զինվոր տղաները, ովքեր 20 տարի պատիժ են կրել և արդեն հասուն մարդ են, կարո՞ղ են հույս ունենալ, որ համաներումը կտարածվի իրենց վրա կամ վաղաժամկետ կազատվեն»,-Զոհրաբյանն իր հարցն ուղղեց նախարարին։

Նա հորդորեց այդ դեպքերը կրկին քննել ու մեկ վկայով ցմահ դատապարտվածներին համաներման մեջ ընդգրկել։

Զոհրաբյանը նաև նկատեց, որ դատապարտվածներից մեկին, ով 23 տարի արդեն նստած է, վաղաժամկետ ազատելու համար հարցրել են, թե այս տարիների ընթացքում բանաստեղծություն գրե՞լ է, թե՞ ոչ։ Ու երբ բացասական պատասխան են ստացել, ասել են, թե նրան չեն ազատում, քանի որ եթե բանաստեղծություն չի գրել, ուրեմն մարդկայնորեն չի փոխվել։

«Սա աբսուրդ է ու ընդհանրապես պետք է պարզել, թե էդ ովքեր են ընդգրկված հանձնաժողովում, և ունեն արդյոք տարրական գիտելիքներ, թե ինչպես պետք է աշխատել դատապարտյալների հետ»,- նկատեց Զոհրաբյանը։

Նա նաև նկատեց, որ խնդիր է նաև հեռախոսից չօգտվելու հարցը, քանի որ դատապարտյալներից մեծ մասի ծնողները Հայաստանում չեն, և կապը միայն հեռախոսով է։ Ըստ պատգամավորի՝ կալանավայրերում կարող են գոնե սկայպ տեղադրել, որպեսզի դատապարտյալները տեսակցության ժամը կարողանան սպառել սկայպով կապ հաստատելով հարազատների հետ։

Նաիրա Զոհրաբյանի խոսքով՝ եթե ուզում են արդար մոտեցում, ապա միայն այս հարցերը վերանայելով կարող են դրան հասնել։ Պատգամավորը մեկ անգամ ևս նշեց, որ մեծ ուշադրությունը պետք է սևեռել ցմահ ազատազրկվածների վրա, որոնցից մեծ մասի ծնողներն այդ պահին ԱԺ դիմաց են և պահանջում են վերանայել իրենց որդիների համաներման հարցը։

Նաիրա Զոհրաբյանը նկատեց նաև, որ նախարարի մատնանշած մարդասիրությունը չպետք է լինի ընտրովի: