Կրկնակի անթույլատրելի է ոստիկանապետ Օսիպյանի լռությունը, որը պատանդ է եղել. Շարմազանովն ԱԺ-ում բարկացավ

Որևէ մեկը չի կարող համաներման ակտին դեմ լինել: Մեր իշխանության շրջանում մենք բազմաթիվ անգամներ համաներման ակտով հանդես ենք եկել, և ես ողջունում եմ համաներում հայտարարելու գաղափարը: Այստեղ մեր և մեր սիրելի իշպանության կարծիքները համընկնում են: Այդ մասին այսօր Ազգային ժողովում ասաց Ազգային ժողովի փոխխոսնակ, Հանրապետական խմբակցության պատգամավոր Էդուարդ Շարմազանովը՝ հավելելով, որ որոշ վերապահումներ ունի:

«Բազմաթիվ անգամ նշել եմ, որ ՊՊԾ գնդի գրավումը հարձակում էր Հայաստանի Հանրապետության վրա: Որևէ տարբերություն չեմ տեսնում ՊՊԾ գնդի գրավման, Հայաստանի Հանրապետության սահմանի վրա ոտնձգության կամ Արցախում կանգնած մեր զինվորի վրա հարձակման միջև: Որևէ տարբերություն չկա: ՊՊԾ գնդում զոհված գնդապետ Վանոյանը պաշտպանում էր բոլորիս պատիվը, Հայաստանի Հանրապետության պատիվ, շահը՝ Նիկոլ Փաշինյանից, մինչև Էդուարդ Շարմազանով: Բոլորիս»,- նշեց Շարմազանովը:

Ըստ պատգամավորի՝ եթե ՊՊԾ գունդը գրավողներին համաներում շնորհվի, ապա դժվար կլինի զոհված ոստիկանների ընտանիքի աչքերին նայելը: 

«Եվ էսօր մենք ի՞նչ աչքերով ենք նայելու էդ մարդկանց ընտանիքներին, երբ որ ՊՊԾ գնդի գրավողներին այս համաներմամբ ազատ ենք արձակում: Մենք սրանով ական ենք դնում ՀՀ պետականաության տակ: Ինձ համար երկրորդական ա՝ վարչապետը Սարգսյանն ա, Պողոսյանն ա, Փաշինյանն ա, Շարմազանովն ա, թե Մինասյանն ա, կապ չունի: Կարևորը Հայաստանի Հանրապետությունն է: Էսօր դուք իշխանություն եք: Աստված մի արասցե դուք պատկերացնո՞ւմ եք, եթե նման բան լինի, էլի մենք պիտի համաներենք: Մենք ստեղծում ենք նախադեպ, որ, ասում եմ՝ գիտե՞ս ինչ կա, Հայաստանի Հանրապետության վրա դու հարձակվի, մենք կհամաներենք: Սա անթույլատրելի է»,- ասաց ՀՀԿ-ական պատգամավորը:

Շարմազանովը նշեց, որ կրկնակի անթույլատերլի է ոստիկանապետի, ուժային կառույցների լռությունը՝ քար լռությունը: Նա հիշեցրեց, որ ներկայիս ոստիկանապետ Օսիպյանը ՊՊԾ գնդի գրավման ժամանակ պատանդ է եղել:

«Իմ հերոսը ոչ թե ՊՊԾ գունդը գրավողն ա, այլ իմ հերոսը գնդապետ Վանոյանն ա, որը մինչև վերջ Հայաստանի Հանրապետության շահը պաշտպանել է, ապրիլյան պատերազմի ժամանակ էլ գնացել, 18 տարեկան զինվորի կողմին կանգնել է ու Հանայստանի Հանրապետությունը պաշտպանել է: Սա է խնդիրը: Ձեր ցավը տանեմ, էստեղ իշխանություն-ընդդիմությւոն խնդիրը չկա, սաղիս երեխեքը մեր երկրում ենք ապրելու, մենք էս ի՞նչ ենք անում: Համաներմանը կողմ եմ ,ՊՊԾ գունդը գրավողներին համաներում անելուն դեմ եմ»,- իր խոսքը եզրափակեց ԱԺ փոխխոսնակը: