ԱԺ արտահերթ ընտրությունների «պատշաճ» կազմակերպումը Մուկուչյանի «լինել-չլինելու» հարցն է

Անհամեմատ կարճ ծավալում կատարվելու է ահռելի ծավալով աշխատանք: Այսպես է որակում մինչև առաջիկա արտահերթ խորհրդարանական ընտրություններն ընկած ժամանակահատվածը  Կենտրոնական ընտրական հանձնաժողովի նախագահ Տիգրան Մուկուչյանը:

Նա լրագրողների հետ զրույցում նկատեց, որ այն ամենը, ինչ նախկինում իրականացրել են 70 օրվա ընթացքում, այժմ ստիպված են լինելու անել ընդամենը 40 օրում:

Այդ է պատճառը, որ Մուկուչյանն այս պահին, իր իսկ խոսքով, մտածում է միայն մի բանի մասին՝ կազմակերպել պատշաճ ընտրություններ:

Այդ էր պատճառը, որ նա լրագրողի հարցին, թե մտադի՞ր է արդյոք Մուկուչյանը մնալ նույն պաշտոնում ընտրություններից հետո և արդոք քաղաքական իշխանությունը նրա հետ այդ մասին քննարկե՞լ է, ԿԸՀ նախագան կրկնեց արդեն իր կողմից հայտարարվածը՝ այս պահին, բացի մի խնդրից, ոչինչ չի մտածում.

«Ես մտածում եմ միայն մեկ բանի մասին՝ հանձնաժողովի թիվ մեկ խնդիրն ընտրությունները նորմալ ձևով կազմակերպելն է»: 

Սա թերևս, առանց Մուկուչյանի նման հայտարարության էլ, ակնհայտ է. չի բացառվում, որ հենց այդ խնդրի լուծմամբ են պայմանավորված դրանից հետո նրա հետ տեղի ունենալիք բոլոր իրադարձությունները: Մուկուչյանի «լինել-չլինելու» հարցը «պատշաճ» կազմակերպված ընտրությունների տրամաբանական շարունակությունն է լինելու: Եթե Մուկուչյանը «հանձնի քննությունը», ապա կշարունակի մնալ ԿԸՀ նախագահի պաշտոնում, եթե ոչ՝ հրաժեշտ կտա տարիներով տաքացրած աթոռին:

Ուշագրավ է նաև «Քաղաքացիական պայմանագիր» կուսակցության ղեկավար, ՀՀ վարչապետի Ժ/Պ Նիկոլ Փաշինյանի հնչեցրած տեսակետը, թե անկախ նրանից, թե ինչ օրենսգրքով կկազմակերպվեն ընտրությունները, ՔՊ-ն հաղթելու է:

Այստեղ հարց է ծագում, թե Փաշինյանն ավելի շատ հույսը դնում է օրեցօր իրենից հույսը կտրող ժողովրդի՞ վրա, թե՞ Տիգրան Մուկուչյանի գեղարվեստական մտքի ու կախարդական վրձնի:

Իհարկե, այս հարցը գուցե առաջ չքաշվեր, եթե Փաշինյան ինքը, դեռ տարիներ առաջ, որպես ՀԱԿ անդամ, իր համախոհների հետ միասին, կասկածներ չհայտներ Մուկուչյանի կողմից ընտրությունները կեղծելու, թվեր նկարելու վերաբերյալ: Ինչպես նաև ժամանակին չասեր, թե մինչև ԸՕ-ն չփոխվի, ընտրություններն արդար չեն կարող լինել:

Հիմա նա ընտրությունների է գնում հին օրենսգրքով, ու «թվեր կեղծող» Մուկուչյանի հետ, ու այդ ամենով վստահաբար հայտարարում է, թե հաղթելու են...

Փաշինյանն այնքան միամիտ չէ, որ չտեսնի, թե ինչպես է հեղափոխական էյֆորյան ցիրուցան եղել, դա մի կողմից: Մյուս կողմից էլ՝ մամուլում շրջանառվող լուրերի համաձայն՝ նա հենց սկզբից էլ սկզբունքորեն դեմ չի եղել, որ փորձառու Մուկուչյանը շարունակի պաշտոնավարել: Երևանի ավագանու ընտրությունների փորձությունից հետո, արդեն արտահերթ խորհրդարանական ընտրություններն էլ են վստահվել Մուկուչյանին:

Ու այդ է պատճառը, որ Մուկուչյանն այս պահին չի մտածում այլ բանի մասին, քան այս փորձությունն էլ պատվով ու պատշաճ անցկացնել: Հակառակ դեպքում՝ նրա խաղն ավարտված կարելի է համարել:

NEWSPRESSA.am