Հանքարդյունաբերության հասցրած վնասները. «Մեկ առողջություն» կոալիցիան ահազանգում է (տեսանյութ)

Արդեն 3 տարի նոյեմբերի 3-ը նշանավորվում է որպես «Մեկ առողջության» միջազգային օր: Այս տարի Հայաստանը ևս ընդգրկվեց այն երկրների շարքում, որոնք նշում են այդ օրը: Այդ նպատակով, 5 կազմակերպություններ՝ միավորվելով՝ ստեղծել են կոալիցիա: Միավորված կազմակերպությունները մինչ այս առանձին-առանձին զբաղվել են մարդկանց շրջապատող միջավայրի անվտանգության ու առողջության խնդիրներով: Այժմ նրանք միասին փորձելու են վեր հանել մարդկանց առողջությանը վնաս հասցնող այն խնդիրները, որոնք մինչ այս դուրս են մնացել երկրի իշխանության ուշադրությունից կամ դրանց մակերեսորեն են անդրադարձել:

NEWSPRESS.am-ը զրուցել է կոալիցիայում ընդգրկված «Երիտասարդ բժիշկների հայկական ասոցիացիայի», «Հույսի ճրագ» բարեգործական ՀԿ-ի, «Թուխմանուկ» կրթական և իրավապաշտպան կենտրոն» ՀԿ-ի, «Էկոլոգիական հասարակական միության», «Թռչնասերների կենտրոն» ՀԿ-ի ղեկավարների հետ:

«Թռչնասերների կենտրոն» ՀԿ նախագահ Սիլվա Ադամյանը առանձնացրեց «Ամուլսարի» խնդիրը: «Թուխմանուկ» կրթական և իրավապաշտպան կենտրոն» ՀԿ-ն ներկայացնող Մարիամ Չախոյանն էլ նկատեց, որ կոալիցիայի նպատակը ոչ միայն խնդիրների վեր հանումն է, այլև դրանց շուրջ երկխոսություն կազմակերպելը կառավարության հետ և լուծումներ գտնելը: 

«Երիտասարդ բժիշկների հայկական ասոցիացիա»-ի նախագահ Եվա Չիչայանն էլ նկատեց, որ թեև առայժմ կոալիցիայում ընդգրկված են միայն 5 կազմակերպություն, սակայն այն բաց է բոլորի համար: «Հույսի ճրագ» ԲՀԿ-ի նախագահ Դոնարա Ալեքսանյանն էլ արդեն իսկ անուններ հնչեցրեց. նա կոչ արեց Սննդի անվտանգության պետական ծառայության  (ՍԱՊԾ) նորանշանակ պետ Գեորգի Ավետիսյանին՝ իր գործում լինել ավելի ազնիվ և ուշադրություն դարձնել կադրերին:

Կոալիցիայի ներկայացուցիչների հետ զրույցի մանրամասները առանձին հրապարակումներով՝ NEWSPRESS.am-ը կներկայացնի հաջորդիվ, իսկ այս անգամ մեկ տեսանյութով ներկայացնում ենք նրանց բարձրացրած խնդիրները: