Շարմազանովի ուզած նվերը Փաշինյանից՝ մնաց օդում կախված. ՀԱՊԿ-ում ինտրիգը խորանում է

Երեկ Յուրի Խաչատուրովն ազատվեց Հավաքական անվտանգության պայմանագրի կազմակերպության (ՀԱՊԿ) գլխավոր քարտուղարի պաշտոնից և, փաստացի, Հայաստանը ՀԱՊԿ-ում այլևս չունի գլխավոր քարտուղար:

Միջազգային հարթակում առանցքային այս պաշտոնը էական դեր ուներ Հայաստանի նման տկար երկրի համար, սակայն իրավիճակ է փոխվել, և, որոշ առումներով՝ այդ իրավիճակը մեր օգտին չի փոխվել:

Փաշինյանի կառավարության ընդդիմախոսների համար դիվիդենտներ հավաքելու լավագույն միջավայրն է ստեղծվել, քանի որ արտաքին քաղաքականության մեջ ունեն լրջագույն հետքայլ և դժվար է ասել՝ պաշտոնը մեզ կրկի՞ն կտրվի, թե՞ Բելառուսն իր հակահայկական քայլը կանի՝ մոռանալով անգամ Լուկաշենկո-Արմեն Սարգսյան հանդիպումը՝ Մյունխենի անվտանգության համաժողովի աշխատանքային խմբի՝ Մինսկի հավաքի շրջանակում, որտեղ, ի դեպ, Լուկաշենկոն հանգստացրել էր Արմեն Սարգսյանին բարեկամական խոսքուզրույցով՝ «Բելառուսը Հայաստանի լավ բարեկամն է, ինչ էլ որ ասեն»:

Ինչևէ, դեռևս պարզ չէ՝ արդյո՞ք նոյեմբերի 8-ին, Աստանայում, կներկայացվի Հայաստանի նոր թեկնածուի անունը, թե՝ ոչ։ Հաշվի առնելով խնդրի նրբությունը հնարավոր է՝ օբյեկտիվ պատճառներով, այս հարցի քննարկումը և կոնսենսուսի ձեռքբերումը երկարաձգվի։

Ներկայացուցիչների փոփոխությունը թերևս երկրորդական հարց է, ով էլ լինի գլխավոր քարտուղարի պաշտոնում, կարևորը դրական արդյունք արձանագրելն է, բայց հետաքրքրական և ինտրիգային է այն, որ այսօր Մոսկվայում են հանգրվանել Մարտի 1-ի գործով երեք առանցքային դեմքերը՝ նույն ինքը՝ Խաչատուրովը, նախկին պաշտպանության նախարար Միքայել Հարությունյանը, Մարտի 1-ի գործով քննչական խմբի ղեկավար Վահագն Հարությունյանը:

Հիշեցնենք՝ Էդուարդ Շարմազանովը ԱԺ ամբիոնից Փաշինյանից նվեր ուզեց՝ ՀԱՊԿ գլխավոր քարտուղարի պաշտոնի պահպանելու տեսքով: Ինչքանով կստացվի Փաշինյանի մոտ նվեր տալ ՀՀԿ փոխնախագահ Շարմազանովին՝ դժվար է ասել:

NEWSSPRESS.am