Փաշինյանի սեփական «գողականը»

Ինչքան մոտենում են ընտրությունները, այնքան ՔՊ-ի շուրջ ինտրիգները խորանում են: Բանն այն է, որ առաջիկա ընտրությունների համար ՔՊ ցուցակը համալրվում է այնպիսի դեմքերով, որոնց տեսակից արդեն ժողովուրդը հոգնել է, սակայն կարծիք կա, որ տարատեսակ հեղինակություններ ամեն դեպքում ՔՊ-ի համար անհրաժեշտություն են:

Մամուլը, մասնավորապես, գրում է Նահապետ Գևորգյանի որդու՝ Քաջիկ Գևորգյանի ռեյտինգային թեկնածու լինելու և քրեական հեղինակություն Տույի քրոջ մասին:

Նահապետ Գևորգյանի մասին շատ բան ասելու կարիք չկա՝ նրան գրեթե բոլորն են ճանաչում, տեսել են անգամ, թե ինչպես կարելի է պատգամավոր լինել և երբևէ ծպտուն չհանել, կա հայտնի խոսք՝ պտուղը ծառից հեռու չի ընկնում:

Քննարկման հաջորդ թեման Տույի քրոջ առաջադրումն է: Թեև ՔՊ-ից արդեն փորձում են հերքել, թե բացառվում է նրանց առաջադրումները, բայց խոսակցություններն այդպես էլ չեն դադարում:

Տույը՝ Արթուր Ղազարյանը, թերևս հայտնի է իր քրեական անցյալով ու ներկայով: Այս մարդը բավականին երկար ժամանակ է՝ իր անօրինականությունների պատճառով չի իջնում մամուլի գլխավոր էջերից, նրան վերաբերող դատերը մշտապես մեծ հետաքրքրություն են առաջացնում: Հիշեցնենք, որ տարիներ առաջ նրան ոստիկանությունը Մաշտոցի պողոտայի և Պուշկին փողոցի խաչմերուկի մոտակայքից, ապօրինի զենք-զինամթերք պահելու և կրելու կասկածանքով բերման ենթարկեց, ապա որոշ ժամանակ հետո ԿՀԴՊԳՎ-ն կրկին «բռնում է» Տույին՝ Սարատովի Արտյոմի և մի խումբ այլ անձանց հետ՝ 37-ամյա մի քաղաքացուն առևանգելու, բռնության ենթարկելու, ապա սեփականությունը խլելու գործով:

Ժամանակին մտերիմ ընկերներ էին ինքը՝ Արթուր Ղազարյանը և նախկին ԴԱՀԿ պետ Միհրան Պողոսյանը: Նրանց հարաբերությունները լարվեցին պատգամավորական ընտրություններից առաջ, երբ պետք է Միհրան Պողոսյանը ՀՀԿ ցուցակով անցներ խորհրդարան:

Սակայն անգամ բռունցքների հասած թունդ վեճից հետո, Տույը բոլոր քանաքեռցիներին հորդորում էր նախ ձայն չտալ գեներալ Միհրանին, ապա նաև ասում էր, որ ամեն ինչ անելու է, որ տապալի պատգամավորական ծրագրերը:

Ինչևէ, չխորանալով այս ամենի մեջ՝ պետք է նկատել, որ նոր իշխանությունները չեն տարբերվում նախորդներից անգամ քրեական հեղինակությունների հետ կապերի հաստատումով: Եթե ՀՀԿ-ի դեպքում կարող էր հենց Տույը խորհրդարան անցնել, ՔՊ-ի դեպքում Տույի տրամադրությունը չփչացնելու համար կանցկացնեն քրոջը: Ոչ մի խնդիր:

Հիշեցնենք նաև, որ ամիսներ առաջ Փաշինյանի և գործարարների հետ հանդիպմանը ներկա էր նաև Արթուր Ղազարյանը՝ Տույը: Դա է պատճառը, որ հակված ենք կարծիքի, որ Փաշինյանը ևս կօգտվի նման հեղինակությունների ծառայություններից, թե չէ՝ ռեյտինգային ընտրապայքարի ժամանակ հանրությանը դժվար  թե կարողանան համոզել Մակունցին կամ Մխիթար Հայրապետյանին ձայն տալ:

NEWSPRESS.am