Կառավարությունում արտակարգ իրավիճակ է. նախարարի ԺՊ-ն անգործությունը խեղդում է ֆլեշմոբով (տեսանյութ)

ՀՀ տրանսպորտի, կապի և տեղեկատվական տեխնոլոգիաների նախարարի ԺՊ Արշակյան Հակոբը ֆլեշմոբ է նախաձեռնել: Թե ինչու, կամ ինչ նպատակով՝ հայտնի է միայն իրեն ու Աստծուն (թեև, մեղք է Աստծուն անիմաստ գործերին խառնելը):

Այս երիտասարդը, որը հասարակության ուշադրության կենտրոնում է հայտնվել իր մի քանի անհեթեթ հայտարարություններով (մասնավորապես, փետրվարի 31-ի հայտնությամբ), նոր մտահղացմամբ է հանդես եկել: Նրա «գլուխգործոցը» այս անգամ ֆլեշմոբն է:

Հավանաբար, քաղաքական ընդհանուր թոհուբոհից հետ չմնալու համար Արշակյանը որոշել է մի բան էլ ինքը նախաձեռնել, ու քանի որ այնքան էլ լավ չի պատկերացնում իր գործառույթը՝ ֆլեշմոբ է սկսել: Իհարկե, այն կարող է հաջողություն ունենալ՝ հաշվի առնելով այն հանգամանքը, որ բոլորը կսկսեն ծաղրել նախարարի ԺՊ-ին՝ նմանակելով նրան, ու ֆլեշմոբը՝ վարակի նման՝  գուցե տարածվի:

Ադեկվատները կընդունեն կատարվածը՝ լավագույն դեպքում՝ որպես կատակ, վատագույն դեպքում՝ խայտառակ ծաղր, իսկ Արշակյանն ինքը և հնարավոր է՝ նաև մի քանի շողոքորթներ (նմանները հաստատ կհայտնվեն), կգնահատեն դա որպես ստացված ֆլեշմոբ:

Բայց, ամեն դեպքում, դրանով նախարարի ԺՊ-ի վարկանիշը հաստատ չի բարձրանա: Նրա՝ բաժակաճառ հիշեցնող անիմաստ ֆլեշմոբի ներքո արդեն ծաղրական գրառումներ ու մեկնաբանություններ են հայտնվել: Այդ մասին կարող են դեռ երկար խոսել, ծիծաղել, բայց դրանից վիճակը չի լավանա:

Ծիծաղը՝ ծիծաղ, բայց նոր ձևավորված կամ դեռ ձևավորման փուլում գտնվող Կառավարության անդամների անլուրջ վերաբերմունքն իրենց պաշտոնին, ասել է թե՝ նաև ժողովրդին, արդեն դառնում է խրոնիկ, որն իր հետևանքներն է թողելու հասարակության վրա ու անմիջապես ազդելու է նրա կենսակերպի վրա:

Ու, որ ամենացավալին է, այս անտարբեր ու անգիտակից վերբերմունքն ախտի նման տարածվում է Կառավարության բոլոր անդամների վրա: Այնպես որ, մնում է կարմիր ժապավենով սահմանազատել Կառավարության շենքն ու արտակարգ իրավիճակ հայտարարել: Եթե, իհարկե, նախարարները դարձի չգան ու չսկսեն խեղկատակության փոխարեն գործով զբաղվել...

NEWSPRESS.am