Ինչից է սարսափում Փաշինյանը

Ժիրայր Սէֆիլյանն օգոստոսի 1-ին դիմել էր Հայաստանի Հանրապետության վարչապետ Նիկոլ Փաշինյանին՝ հետին ամսաթվով ՀՀ քաղաքացիություն ստանալու համար, սակայն վարչապետի աշխատակազմի ղեկավար Էդուարդ Աղաջանյանից պատասխան են ստացել, որ այդ հարցը կարող է լուծվել դատական կարգով և Կառավարությունը մերժել է Սէֆիլյանին:

Այսօր այդ հարցին անդրադառնալով, արդարադատության նախարարի պաշտոնակատար Արտակ Զեյնալյանը նշել է, որ նախարարությունը դրական եզրակացություն է տվել այդ դիմումին:

Փաստորեն, նախարարությունը դրական եզրակացություն է տվել, իսկ Կառավարությունը մերժել է. հետաքրքիր է, որ օգոստոսի մեկին հասցեագրված դիմումը հիմա է մերժվում և Սէֆիլյանին ցույց է տալիս դատարանի տեղը, իսկ թե ինչ ծանրաբեռնվածությամբ են աշխատում մեր դատարանները՝ մենք հո լավ գիտենք. գրեթե անհնար կլինի մի քանի օրվա մեջ դատական կարգով քաղաքացիության հարց լուծել, ինչն էլ շատ լավ իմանալով՝ դատարանի դռան տեղն են ցույց տվել դիմումատուին:

Ինչի՞ց է վախենում Նիկոլ Փաշինյանը և «Սասնա Ծռերի» հաշվով ինչո՞ւ է այդքան զգուշավոր: Հավանաբար, նա սարսափում է «Ծռերի» նման ընդդիմություն ունենալու մտքից անգամ, որոնց պարագայում բացառված չէ Ազգային ժողովի շենքի պաշարումն ու սեփական պահանջների առաջադրումը և սա՝ հատկապես այն համատեքստում, երբ «Ծռերն» այդպես էլ զենքով հարց լուծելու էջը փակված չեն համարում: 

Ժիրայր Սէֆիլյանին, ով պետք է լիներ «Սասնա Ծռերի» կուսակցության համամասնական ցուցակի առաջին համարում, քաղաքացիություն չտալով, զրկում են խորհրդարանում հայտնվելու շանսից՝ նրա հետ զրկելով իր ողջ թիմին, քանի որ բոլորին ակնհայտ է, որ այդ կուսացության գլխավոր դերակատարը հենց Սէֆիլյանն է:

Նա էր, որ կարողանալու է քվեներ տանել իր թիմակիցների համար և հիմա, փաստորեն, Փաշինյանն այսկերպ ազատում է իր ձեռքերը «Սասնա Ծռեր» գլխացավանքից:

NEWSPRESS.am