Ի՞նչ է պատրաստվում բացահայտել Սարգսյանը

Արտահերթ խորհրդարանական ընտրություններին ընդառաջ՝ Հայաստանում ձևավորվեց հերթական դաշինքը, որը հավակնում է դառնալ Նիկոլ Փաշինյանի իշխանության թիվ մեկ ընդդիմախոսը:

Այսօր համագործակցության հուշագիր ստորագրեցին «Ազատ դեմոկրատներ» և «Հանրապետություն» կուսակցությունները՝ խորհրդարանական ընտրություններին հայտ ներկայացնելով հանդես գալ «Մենք» դաշինքով:

«Մենք հավակնում ենք լինել իշխանությունների գլխավոր այն ընդդիմախոսը, որը բովանդակային առումով և բառացիորեն, ՀՀ տեսլականի առումով՝ նոր թարմություն կբերի: Այն քաղաքական ուժն ենք հավակնում լինել, և վստահաբար արդեն այդպիսին կանք, որ կօժանդակի այն փոփոխություններին, որ այսօր կառավարությունը նախաձեռնել է»,-ասաց «Ազատ դեմոկրատներ» կուսակցության նախագահ Խաչատուր Քոքոբելյանը:

Քոքոբելյանի կարևոր հայտարարությունից բացի՝ պակաս կարևոր չէր «Հանրապետություն» կուսակցության նախագահ Արամ Սարգսյանի՝ Նիկոլ Փաշինյանի երբեմնի թիմակցի ու աջակիցի հայտարարությունը:

Սարգսյանը, մասնավորապես, նշել է.

«Հանրապետական»-ն ու «Քաղաքացիական պայմանագիր»-ը կարող են դաշինք կնքել, որովհետև այսօրվա դրությամբ գաղափարական առումով նույն հարթության վրա են և ես այլընտրանքն եմ իրենց, ոչ թե հակառակորդն եմ, որովհետև ասում եմ, որ այդ ուղին է ճիշտ»:

Ուշագրավ տեսակետ է հայտնել Արամ Սարգսյանը, այն էլ՝ նախընտրական Հայաստանում, և, ըստ էության, նրա այս արտահայտությունը կարող է վերջնականապես սեպ խրել իր ու Փաշինյանի, իր ու կազմաքանդված ԵԼՔ-ի միջև:

Որ լսարանին էր ուղված Սարգսյանի այս ակնարկը և ինչ է փորձում սրանով հասկացնել Փաշինյանին լավ ճանաչող «Հանրապետություն» կուսակցության նախագահը՝ 100 տոկոսով պնդել չենք կարող: Բայց, որ այս ակնարկի տակ թաքնված է իրական ճշմարտություն, մի բան, ինչ Փաշինյանը խնամքով թաքցնում է կուրորեն իրեն հավատացող ժողովրդից՝ փաստ է:

Հավանաբար, այդ ճշմարտությունն Արամ Սարգսյանը կբացահայտի Ազգային ժողովում, եթե, իհարկե, հաջողվի այնտեղ հայտնվել, կամ գուցե ավելի վաղ՝ սպասվող քարոզարշավին՝ հրապարակ նետելով նմանատիպ ևս մեկ արտահայտություն ու բենզին լցնելով քարոզարշավի վրա:

Ու եթե ավագանու քարոզարշավի ժամանակ կար Ռոբերտ Քոչարյանի, սևի ու սպիտակի, հեղափոխության ու հակահեղափոխության գործոնը, ապա այժմ դրանք ծեծված թեզեր են, ուստի քարոզարշավն անհրաժեշտ է թեժացնել նոր բացահայտումներով, ինչն էլ կանի Փաշինյանի թիվ մեկ ընդդիմախոսը՝ «Մենք» դաշինքը: