Այնպիսի լկտի բաներ են արվել, որոնց մասին ես հիմա հնարավորություն չունեմ խոսելու. Մեսչյանը զգուշացնում է հողազավթում անողներին

Դա հողազավթման ամենակոպիտ տարբերակն էր: Իրենց բազմիցս զգուշացրել էինք, որ մի արեք, շարունակում էին: Գիտե՞ք՝ ինչ, ամեն ինչը չափ ունի: Այդ մասին այսօր լրագրողների հետ զրուցյում ասաց Երևանի գլխավոր ճարտարապետ Արթուր Մեսչյանը՝ անդրադառնալով Նոր Նորքում ապօրինի շինարարության ապամոնտաժման դեպքին: 

«Դուք մի կարծեք՝ ես մեծագույն երջանկությամբ եմ ընդունում, երբ բուլդոզերը խփում է պատին, դա շատ վատ բան է, բայց մի հասցրեք դրան»,- զգուշացրեց Մեսչյանը: 

Դիտարկմանը, թե, փաստորեն, սա նաև օրինա՞կ էր մյուսների համար, որ այլևս թույլ չեն տրվելու ապօրինի շինություններ կառուցվեն, մայրաքաղաքի գլխավոր ճարտարապետը պատասխանեց. «Ես ուզում եմ ինձ ճշգրիտ հասկանաք. երբ մի բան է ասվում, որ ապօրինի շինարարությանը վերջ, դա հեռուստատեսային ծրագիր չէ, դա շոու չէ: Ամեն մի ասված նախադասություն ունի որոշակի պատասխանատվություն: Մի արեք»:

Նա ընդգծեց, որ այն, ինչ արվել է մինչ օրս, այլ հարց է, սակայն այն պահից, ինչ ինքը ստանձնել է Երևանի գլխավոր ճարտարապետի պատասխանատու պաշտոնը, այլևս նույնը չի լինելու: Նա ևս մեկ անգամ հորդորեց այն քաղաքացիներին, ովքեր պատրաստվում են հողազավթում կամ ապօրինի շինարարություն անել, չանել դա, որովհետև դա ոչ մի դեպքում չի օրինականացվելու: Միևնույն ժամանակ, նա նշեց, որ կլինեն դեպքեր, երբ կօրինականացվեն որոշակի շինություններ: Մասնավորեցնելով խոսքը՝ Մեսչյանը նկատեց, որ ահռելի քանակով մարդիկ կան, ովքեր ծանրագույն սոցիալական վիճակում են, որ ժամանակին կարողացել են ինչ-որ բան կառուցել, որ ընտանիքն այդտեղ ապրի. «Ես ի՞նչ բարոյական իրավունք ունեմ այդ մարդկանց տները չօրինականացնել»,- ասաց նա:

Հարցին, թե ինչո՞ւ են սովորաբար, մարդիկ գնում ապօրինի կառուցելու, ապա օրինականացնելու ճանապարհով, Մեսչյանը պատասխանեց, որ պատճառը շատ պարզ է. «Որովհետև կատարվում էր ամենախայտառակը. այն մարդիկ, ովքեր պետք է հսկեին, որ ապօրինի շինարարություն չարվի, քաջալերում էին ու բերում էին ապօրինի շինարարության՝ և՛ ոստիկանությունը,  և՛ թաղապետարաննները: Բոլորը մեղավոր են նրա համար, ինչի խնդրի առջև հիմա կանգնած են Երևանի բնակիչները: Մեղքն ամբողջովին իրենցն է, քաղաքացիների մեղքը 20 տոկոսն է, մնացածը պատասխանատուների մեղքն է»:

Ըստ Երևանի գլխավոր ճարտարապետի՝ որոշներին պետք է ներել, մյուսներին՝ ներել չի կարելի: 

«Կան մարդիկ, ում անպայման պետք է ներել, կան մարդիկ, ում կառուցածը պետք է անպայման քանդել, առանց որևէ խաղերի, որովհետև այնպիսի լկտի բաներ են արվել, որոնց մասին ես հիմա հնարավորություն չունեմ խոսելու: Ամեն ինչը չափ ունի: Իմացեք մի բան՝ հողազավթումը գողություն է երկրից, գողություն է մեր բոլորի ունեցվածքից: Մի՛ արեք այդպիսի բաներ, հողազավթումը վերջացավ, տղե՛րք, ոչ մի քառակուսի մետր հող մի՛ զավթեք, որովհետև պրոբլեմ եք ունենալու և եթե հույս ունեք, որ հետագայում կկարողանաք օրինականացնեք, մոռացեք դրա մասին»,- ընդգծեց Երևանի գլխավոր ճարտարապետը: