Տրանսֆերտների հարցում պետք է զգույշ լինել, սա հետքայլ է. Վահրամ Բաղդասարյան

Ես տրանսֆերտների հարկմանը դեմ եմ եղել թե՛ նախորդ իշխանությունների ժամանակ, թե՛ ներկայիս: Այդ մասին ԱԺ-ում ճեպազրույցի ժամանակ հայտարարեց Հանրապետական խմբակցության ղեկավար Վահրամ Բաղդասարյանը՝ անդրադառնալով ՊԵԿ-ի նախագծին՝ եկամուտների համընդհանուր հայտարարագրում մտցնել և հարկել նաև տրանսֆերտները:

ՀՀԿ-ական պատգամավորը նկատեց, որ տրանսֆերտները երկրի համար լուրջ նշանակություն ունեն, ու դրա շնորհիվ է Հայաստանը պահպանել իր կայունությունը: Այնպես որ, ըստ Բաղդասարյանի, այս հարցում պետք է ուշադիր և զգույշ լինել:

«Այդպիսի փոփոխության դեպքում՝ տրանսֆերտների ստացման օրինական ճանապարհները կվերանան, մարդիկ իրենց հարազատների օգնելու համար կգնան զարտուղի ճանապարհով, և պաշտոնապես ուղարկվող տրանսֆերտների քանակը կնվազի»,- ասաց Վահրամ Բաղդասարյանը:

Նա նկատեց նաև, որ այս փոփոխությունը կարող է սոցիալական լուրջ դժգոհություններ առաջացնել:

«Իհարկե, հանրությանը դժվար է բացատրել: Այսօր միտինգում կանգնած մարդկանց 70%-ն ուզում է հարկեր չվճարել, ուզում են աշխատավարձ և թոշակ բարձրանա, բայց հարկեր չտան: Նրանց դա չի հետաքրքրում, կոնկրետ եկամտի մասին են մտածում, թե ինչո՞ւ պետք է իմ հարազատին ուղարկված գումարը մի հատ էլ եկամտահարկով հարկվի: Եվ մեծ դժգոհություն է առաջացնելու»,- նկատեց պատգամավորը:

Բաղդասարյանը նաև համամիտ էր այն դիտարկմանը, որ ոչ միայն այս, այլև մի շարք նմանատիպ այլ քայլերով, նոր իշխանությունը շարունակում է նախորդի քաղաքականությունը: Նա խոստումների մասով ևս արդյունք չի տեսնում:

«Կենսաթոշակի և աշխատավարձի բարձրացում, ներդրումների հեղեղ, ներգաղթ, ավելի մանր գործերի հետ կապված՝ կարմիր գծերի ու տեսանկարահանող սարքերի վերացում և այլն. կա՞ն նախադրյալներ, տողեր բյուջեում, որ այդ խոստումներին ընդառաջելու են՝ ես չեմ տեսնում»,- ասաց Բաղդասարյանը հավելելով, որ փաստացի շարունակվում է այն, ինչ սկսել էր նախորդ իշխանությունը:

Ընդհանուր առմամբ, Բաղդասարյանն իրավիճակը հետքայլ է որակում:

«Հետո էլ մեզ էին ասում. այստեղ պետք է շրջապատը փոխել, լուրջ մասնագետներով շրջապատվել: Ես ցավ եմ ապրում, շատ մեծ վտանգ եմ տեսնում, թե ինչ կոնտինգենտ է լցվելու ապագա ԱԺ-ն ու կառավարությունը: Հարցերը շատ են, համբերենք, կտեսնենք: Տա Աստված՝ ամեն ինչ լավ լինի»,- եզրափակեց Բաղդասարյանը: