Սա անձնական հեղինակության հարց չէ, այլ ՀԱՊԿ-ի արդյունավետ աշխատանքի, մանավանդ գիտենք՝ ում հետ գործ ունենք. Ռուստամյան

Եթե ՀԱՊԿ-ում առաջանան խնդիրներ, դրանից առաջին օգտվողը ո՛չ թե Հայաստանն է լինելու, այլ հենց Ադրբեջանը: Այդ մասին ԱԺ ճեպազրույցների ժամանակ ասաց ՀՅԴ խմբակցության ղեկավար Արմեն Ռուստամյանը: Նա նկատեց, որ այս թեմայով Ադրբեջանի նախագահ Իլհամ Ալիևը տարբեր հեռուստաընկերություններով հեռարձակվող հաղորդումների ժամանակ հրճվանք է արտահայտում՝ մեղադրանքի սլաքն ուղղելով Հայաստանի կողմը:

«Նա հայտարարում է, թե՝ տեսեք, եթե կա պրոբլեմ, այդ պրոբլեմը Հայստանի մոտ կարող եք գտնել: Այսինքն՝ մենք պետք է այս հարցում նրբանկատ ու մտածված լիենենք: Պետք է այնպիսի քայլեր կատարենք, որպեսզի մի կողմից մեր երկրի համար ՀԱՊԿ-ի նշանակությունը, Հայաստանի անվտանգության առումով, իրական դառնա, մյուս կողմից էլ՝ չունենալով այլընտրանք այլ դաշտերում՝ չպետք է թույլ տալ, որ այդ կառույցի հետ հարաբերությունները դրվեն հարվածի տակ»,- նկատեց Ռուստամյանը:

Հարցին, թե չպե՞տք է Հայաստանը բացատրություն պահանջի Բելառուսից և Ղազախստանից, ինչպես դա արեց վարչապետի պաշտոնակատար Փաշինյանը, և չպե՞տք է արդյոք ինչ-որ կերպ արձագանքի Բելառուսի ԱԳՆ-ի վիրավորանքին, Արմեն Ռուստամյանը պատասխանեց.

«Ես էլ, չէ՞, հիմա դիրքորոշում արտահայտեցի, արտահայտեցի, չէ՞, բայց այլ ձևակերպմամբ. պահանջել ինչ-որ բաներ այլ երկրի ղեկավարից, ճիշտ չէ. նա կարող է նույն հեշտությամբ ասել, որ դուք դրա իրավունքը չունեք, նախագահ եմ և պարտավոր չեմ պատասխան տալ իմ քայլերի համար: Այսինքն՝ մենք պետք է շատ հստակ դնենք խնդիրն այնտեղ, որ մենք ունենք այս կառույցն ավելի արդյունավետ դարձնելու, պայմանավորվածությունը հարգելու և մեր դիրքորոշումը հայտնել այս ձևակերպմամբ»,-ասաց Արմեն Ռուստամյանը՝ դարձյալ կրկնելով, որ հարցը ձևակերպման մեջ է: Նա նկատեց նաև, որ չպետք է թույլ տալ, որ ձևակերպման պատճառով հակառակ կողմն օգտվի դրանից և հարցը տեղափոխի բոլորովին այլ դաշտ:

Ըստ ՀՅԴ պատգամավորի՝ խնդիրն այժմ տեղափոխվել է անձնական հեղինակության հարթություն, որը երևում է կողմերի հայտարարություններից: Մինչդեռ չպետք է նման բան թույլ տալ:

«Խնդիրն անձնական հեղինակությունը կասկածի տակ դնելու հարց չի էստեղ, հարցը ՀԱՊԿ-ի արդյունավետ աշխատանքի մասին է, որի տրամաբանության մեջ էլ պետք է մոտենալ հարցին և անձնական լարվածություն չստեղծել»,- նկատեց Արմեն Ռուստամյանը:

Նա նկատում է, որ պետությունների հարաբերությունները չպետք է անձնական հարաբերությունների վրա հիմնվեն և դրանից տուժեն:

«Այդ հարաբերությունները, որքան լավ լինեն, Հայաստանն այնքան օգուտ կքաղի, մանավանդ որ գիտենք, թե ում հետ գործ ունենք: Այսինքն՝ այդ մարդկանց համար ցանկացած գնահատական կարող է խզել հարաբերությունները»: