«Համարձակ քայլի՛ր, Նիկոլ». ԼԳԲՏ ակտիվիստներն ակցիա են արել՝ համբուրվելով քայլելով Երևանում (լուսանկարներ)

Մինչ վարչապետի ժամանակավոր պաշտոնակատար Նիկոլ Փաշինյանն իր քարոզարշավն է անում մարզերում, Հայաստանի սրտում՝ մայրաքաղաք Երևանում, նույնասեռականներն իրենց քարոզն են իրականացնում:

Դեռ վերջերս, ՀՀ ոստիկանապետ Վալերիյ Օսիպյանը վստահեցնում էր ու հաստատակամ հայտարարում, թե Հայաստանի տարածքում ԼԳԲՏ ֆորում չի անցկացվի, իսկ այսօր այլ տեսարանի ականատես ենք լինում: Պարզվում է՝ արդեն  մի քանի օր է՝ նոյեմբերի 16–ին և 17–ին, NOAH PRIDE միջազգային իրավապաշտպան կազմակերպությունը  Երևանում անցկացրել է հանրային ակցիաներ:

Դե հնարավոր է նաև Օսիպյանը մտածել է, թե Երևանը Հայաստանի հետ որևէ կապ չունի. իսկապես՝ Երևանն ո՜ւր, մարզերն ուր, բայց պետք է հիասթափեցնել ոստիկանապետին՝ նրան տեղեկացնելով (եթե չգիտի), որ Հայաստանի տարածքում ֆորումին նվիրված ակցիա եղավ: Թեև հնարավոր է նաև Օսպյանն ուզում էր փափուկ բարձ դնել ակցիայի դեմ պայքարող հասարակության գլխի տակ, որպեսզի նրանք էլ ավելի չբորբոքվեն ու այդ օրերին պատմություններ չսարքեն իրենց գլխին: Ամեն դեպքում թերևս ոստիկանությունը կտա իր պարզաբանումը։

Հարկ է նկատել նաև, որ ակցիայի հիմնական նպատակը ոչ միայն Հայաստանում ԼԳԲՏ շարժման ակտիվիստներին աջակցելն է, այլև այն աջակցություն է վարչապետ Նիկոլ Փաշինյանի քաղաքականությանը: Համենայնդեպս ակցիայի մասնակիցներն իրենք այդպես են որակել այն: Նրանց կարգախոսը եղել է՝ «Համարձակ քայլի՛ր, Նիկոլ» և «Բարև, Երևան»:

Իսկ ինչ են անում նրանք. պարզապես մի քանի ակտիվիստ իրենց խորհրդանիշ դրոշով անցել են Հանրապետության հրապարակով, Երևանի տեսարժան այլ վայրերով ու մի քանի րոպե կանգնել այդ տարածքում: Եվ, կուլմինացիան, համարձակ տղաները բոլորի աչքի առաջ համբուրվել են, որոշ դեպքերում՝ նույնիսկ կիսամերկ վիճակում:

Ավելին ասել ակցիայի մասին՝ չենք ցանկանում, որպեսզի ինքնին այն որպես նույնասեռականների գովազդ չդիտարկվի, պարզապես հարկ է ևս մեկ անգամ պատկան մարմինների ուշադրությունը հրավիրել խնդրին ու սթափության կոչ անել բոլորին: Դեռ հարկավոր է պատաախան տալ, թե ինչու են տղաներն ազատ համբուրվելով քայլում փողոցով մեր ու մեր երեխաների աչքի առաջ: Սա երկի՞ր է, թե բարդակ, պարո՛ն Փաշինյան։ Դե գնա ու «Համարձակ քայլի՛ր, Նիկոլ»...

Արմինե Մկրտումյան