Ամոթ քեզ, Սասուն, «կազմաքանդվեցիր», հրամանատարից շուտ վերածվեցիր չինովնիկի

ԱԺ նախընտրական քարոզարշավի շրջանակներում Թալինում գտնվող «Իմ քայլը» դաշինքի անդամ, ԱԺ պատգամավորի թեկնածու Սասուն Միքայելյանն իր ելույթում կարծիք հայտնեց, թե հասարակությունը չի հասկանում հեղափոխության հաղթանակը․

«Ես չեմ վախենում ասել՝ այն հաղթանակը, որ հանրապետությունում կրեցիք դուք՝ հայ ժողովուրդը՝ ավելի կարևոր էր, քան Արցախյան ազատամարտը»։

Նախ, արդարության համար պետք է ասել, որ եթե հանկարծ հեղափոխության օրերին Արցախի ու Հայաստանի սահմանին սպառնար թշնամին, Միքայելյան Սասունն ու իր «դաշնակիցները» հազիվ թե կարողանային հեղափոխություն անել ու հաղթանակի հասնել։ Ամբողջ ազգը մեկ մարդու նման կլիներ սահմանին, քանի որ առանց այդ սահմանը պահելու, ու առավելևս առանց Արցախյան ազատամարտ ունենալու, հազիվ թե մենք հայրենիք ունենայինք․․․

Այնպիսի տպավորություն է, որ Միքայելյան Սասունի համար ավելի մեծ արժեք է ՀՀԿ-ի ձեռքից վերցրած իշխանությունն ու մասնավորապես իր որդու համար  «գրաված» աթոռը, քան երեկ, մեր քաջարի զինվորների արյան գնով վերադարձրած հողերը։

Եթե Սասուն Միքայելյանն ազատամարտիկ չլիներ ու մասնակցած չլիներ Արցախյան պատերազմին, ապա կարելի էր կասկածել նրա հայրենասիրությանը, գուցե նաև մտածեինք, որ դու դավաճան ես․․․ դու պատերազմի դաշտում ընկերներ ես կորցրել, ո՞նց կարող ես նման արտահայտություն անել...

Բայց նույնիսկ սա չէ ամենաողբերգականը, այլ այն, որ Սասունի այս արտահայտության իմաստը գուցեև չհասկանալով, անգիտակցաբար, բթացած վիճակում, կամ էլ չգիտես ինչ ազդեցությունների տակ, մարդիկ ծափահարեցին նրան․․․ ծափահարեցին՝ բացականչություններով։ Ողբալի է, ցավալի և անհավատալի՝ այս ո՞ւր ենք գնում այսպես անգիտակից վիճակով․․․

Ցավալի է, որ այդ պահին ոչ ոք գլխի չընկավ, որ ծափահարում է իր հարազատի՝ իր հոր, որդու, եղբոր, բարեկամի թափած արյունն անարգելու և արժեզրկելու համար․․․ Թե՞ իսկապես մտածեցին, որ Նիկոլը Մոնթեն է, նույնիսկ ժամկետային զինծառայություն չանցած Արարատն ու Արայիկը, Ավինյանն ու Մխիթարը՝ Դուշման Վարդանն ու Թաթուլ Կրպեյանն ու Լեոնիդ Ազգալդյանը: Վերջ տվեք խեղկատակությանը: 

Սա իշխանություն չէ, սա ամբոխավարություն է․․․ պոպուլիստական, անիրական ու անհեթեթ հայտարարություններով, ծափերի արժանանալով իշխանության եկան, ու հիմա շարունակում են նույն ոգով ու ոճով ծափեր կորզել ժողովրդից։

Հանուն պոպուլիզմի, հանուն ծափերի իր անցած ճանապարհն ու կորցրած ընկերներին ուրանալը՝ սրբապղծության նման մի բան է․․․

Իր ընկերոջ թափած արյունը հարգող ոչ մի ազատամարտիկ, ով գիտակցում է, թե ուր է գնացել, ինչի համար է պայքարել, ինչ ընկերներ է կորցրել ու ընդհանրապես, քանի կյանք է մնացել ազատամարտի դաշտում, երբեք նման արտահայտություն չպետք է աներ։ Այս ամոթալի հայտարարությունը Սասունի ոչ միայն պատիվ չի բերում, այլև գցում է նրա վարկանիշը։ Նա, ում կողքին զոհվել է իր ընկերը, պարզապես իրավունք չուներ նման հայտարարություն անել։ Այստեղ երկրորդ կարծիք լինել չի կարող․ Ինչպես Նիկոլը կասեր՝ կազմաքանդվեցի՛ր, Սասուն, ազատամարտիկից ու հրամանատար Սասունից շուտ վերածվեցիր չինովնիկի․․․

Ամո՛թ քեզ, Սասուն: 

NEWSPRESS.am-ի հիմնադիր-տնօրեն 

Արիանա (Արմենուհի) Հովսեփյան