Կա՛մ կլսեն մեզ, կա՛մ մենք Չարենցավանում կխաթարենք ԱԺ ընտրությունները. ծնողները դասադուլ են հայտարարել (տեսանյութ)
Չարենցավանի՝ Ամենայն Հայոց Կաթողիկոս Վազգեն Ա-ի անվան N 3 հիմնական դպրոցի ծնողները բողոքի ակցիա են կազմակերպել: Նրանք փակել են դպրոցի մուտքը և հայտարարում են, որ իրենց երեխաներին չեն ուղարկի դպրոց այնքան ժամանակ, մինչև իրենց պահանջը չլսեն:
Բանն այն է, որ նոյեմբերի 9-ին տեղի է ունեցել տնօրենի ընտրություն, քանի որ նախկին տնօրենի՝ Լուսինե Կարապետյանի պաշտոնավարման ժամկետը լրացել է: Վերջինս N 3 դպրոցի տնօրեն է աշխատում 2005թ. ապրիլի 27-ից:
Ծնողները NEWSPRESS.am-ի հետ զրույցում վստահեցնում են, որ նա այդ տարիների ընթացքում ամբողջովին ոտքի է կանգնեցրել դպրոցը և բարեկարգել այն:
«Դեռ ընտրությունները չէին եղել, արդեն ամբողջ քաղաքն էր խոսում, որ մեր դպրոցի տնօրենը փոխվելու է. հասկանո՞ւմ եք՝ ամեն բան այդպես արդար ու օրինական չէ, ինչպես թվում է: Չգիտենք՝ ում հովանավորությամբ, բայց ընտրությունն անարդար է եղել»,- ասում են մեր զրուցակից ծնողներն ու նկատում, որ կոնկրետ ընտրված տնօրեն Աննա Բալյանի դեմ որևէ առարկում չունեն, այլ դեմ են երևույթին, քանի որ այն անարդար է: Նրանց գնահատմամբ՝ անարդար ընտրություններ են կատարվել, ինչն իր հերթին անարդար է նաև իսկապես մեծ համբավ ու վաստակ ձեռք բերած տնօրենի հանդեպ:
«Դպրոցն ունի ավելի քան 800 աշակերտ, 670-ից ավելի ծնող ստորագրել է դիմում-բողոքի տակ: Բայց ասեմ ձեզ, որ հնարավոր է 800 ծնող չլինի, քանի որ մի ընտանիքից 2-3 երեխա է գալիս դպրոց: Բոլորին դիմել ենք՝ քաղաքապետին, մարզպետարան, կառավարություն, նախարարին ու վարչապետին, բայց բոլորը թքած ունեն մեր խնդրի վրչա: Ասում են՝ սերնդափոխություն ենք անում, ընտրություններն էլ արդար են եղել: Բայց մենք վստահեցնում ենք ձեզ՝ սա ուղղորդված ընտրություն էր, որի արդյունքներին մենք դեմ ենք, ու պետք է պայքարենք»,- ասում են ծնողները:
Նրանք պատրաստ են ո՛չ միայն հանել իրենց երեխաներին այդ դպրոցից, այլև քաղաքականացնել հարցը: Թեև այնքան էլ չեն ուզում շահարկել խնդիրը, բայց նժարին իրենց երեխաների ուսման հարցն է. ասում են, որ շարժման օրերին առաջինններից մեկն էին, որ փակեցին դպրոցն ու դուրս եկան փողոց, որ փակեցին Սևան տանող ճանապարհն ու պատռեցին իրենց ՀՀԿ անդամատոմսերը:
Նրանք հիշեցնում են նաև Նիկոլ Փաշինյանի խոսքերը, թե երկիրն ու իշխանությունը ժողովրդին է: Ասում են՝ սա այդ խոսքերն ապացուցելու հնարավորություն է երկրի կառավարության համար:
«Իշխանությունը մե՞րն է՝ մենք պահանջում ենք մեր տնօրենին, ու դասերը նորից կսկսվեն: Եթե ոչ, ապա դեկտեմբերի 9-ի ընտրությունները, կոնկրետ մեր քաղաքում խաթարվելու է: Նոր ղեկավարությանն, իհարկե, դուր չի գա, որ մի ամբողջ քաղաք իր դեմ է: Մենք իր կողքին ենք եղել, հիմա ինքը մեր կողքին չէ ու մեր հարցին լուծում չի տալիս»:
Մանրամասները՝ տեսանյութում
