Հայկ Մարությանը Երևանի խնդիրները լուծե՞ց, որ հիմա էլ լծվել է Սիփան Փաշինյանի քարոզարշավին

NEWSPRESS.am-ն արդեն գրել էր «Իմ քայլը» դաշինքի «մերոնցականների» մասին: Նրանք են՝ Սիփան Փաշինյանը՝ Նիկոլի եղբոր որդին և Հրաչ Հակոբյանը՝ Աննա Հակոբյանի եղբայրը:

Այս մարդիկ դաշինքի համապետական ցուցակի վերջին հորիզոնականներն են զբաղեցնում, բայց առաջադրված են ռեյտինգային ընտրակարգով. նրանց խորհրդարան անցկացնելու համար իրենց օգտին են աշխատում ողջ թիմն ու ֆինանսական ռեսուրսները:

Մասնավորապես, Սիփան Փաշինյանի քարոզարշավի մի կարևոր «ատիրիբուտ» է համարվում Երևանի քաղաքապետ Հայկ Մարությանը: Դե, ընդունում ենք, որ լավ հումորիստ է այս մարդը, և, հնարավոր է` դերասանական ասպարեզում ձեռք բերած իմիջի շնորհիվ կարողանա օգտակար լինել Փաշինյանին, բայց արձակուրդ չվերցրած ու քարոզարշավին լծված քաղաքապետը երևի մոռացել է, թե իրեն ինչի համար են կարգել քաղաքապետի պաշտոնին:

Երևանն այլևս խնդիրներ չունի՞, վե՞րջ, քայլն արված է ու ամեն խնդիր լուծվա՞ծ, որ Մարությանը կարողանա ողջ օրն անցկացնել Տավուշում բուկլետ բաժանելով:

Երևանի քաղաքապետն այդքան մանրանալուց առաջ պետք է նախ այս հարցերի մասին մտորեր՝ դեմ գնալով թիմի՝ Սիփան Փաշինյանին պետք է պատգամավոր անցկացնել՝ պահանջին:

Հետաքրքիր է, հանուն ինչի՞ պետք է Սիփան Փաշինյանին մարդիկ ընտրեն, ե՞րբ են ճանաչել նրան, ի՞նչ անցած ուղի ունի և ի՞նչ արած ու դրած ունի:

Սիփան Փաշինյանի կենսագրությունն այնքան դատարկ ու անասելիք է եղել, որ թեկնածուն ոչ մի կերպ չի հրապարակում այն: Համացանցում տող անգամ չկա, թե ով է Սիփանը և ինչ պլաններ ունի պատգամավոր ընտրվելու դեպքում: Այս դեպքում տավուշցին ինչպե՞ս պետք է որոշի ընտրել նրան միայն նրա համար՝ որ ինքը Նիկոլի եղբոր որդի՞ն է, բա ի՞նչ էին ասում հեղափոխական օրերին, թե այլևս իշխանությունը լցված չի լինելու ծանոթ, բարեկամ, հարազատներով: Ստո՞ւմ էր Նիկոլը. ինչպես երևում է՝ այո:

Ինչո՞ւ, որովհետև այս իշխանություններն ընդդիմադիր լինելու ժամանակ մշտապես դեմ էին խոսում ծանոթ-բարեկամին պատգամավոր ու նախարար դարձնելուն, բայց արի ու տես՝ իշխանության գալով՝ փոխեցին վերաբերմունքը երևույթի նկատմամբ: Նրանք ամեն կերպ իշխանական պլատֆորմը փորձում են սարքել իրենց «ցեղի կոլխոզը», ուր կիշխեն փաշինյաններն ու հակոբյանները:

Արտահերթ խորհրդարանական ընտրությունների քարոզարշավը եկել է փաստելու մեր տեսակետը, երբ ակնհայտ առաջնահերթություն է տրվում այս ազգանունները կրողներին և նրանց մտերիմներին:

Թե որտեղից նաև այն ճոխ գումարները, որոնք ծախսվում են նրանց քարոզարշավներին, մեծ հարց է, բայց, հավանաբար, Նիկոլի գրած գրքի հոնորարներն են, թե չէ՝ ինչպե՞ս կարող ենք բյուջեն մսխելու մեջ մեղադրել այս «ազնվագույն» ուժին: