Գտնվել է Չարենցի ու իր կնոջ ամուսնության գրանցումը․ շուտով Հայաստանում կլինեն արխիվային նոր նյութեր՝ կապված Եղիշե Չարենցի հետ

20-րդ դարը հայ ժողովրդին տվեց մի խումբ հանճարեղ գրողներ։ Որքան էլ ցավալի է, սակայն այդ հանճարների մի մասը զոհ գնաց 1915 թվականի ցեղասպանությանն ու 1937 թվականի Ստալինյան բռնապետությանը։ Ժամանակները վատն էին, սակայն նույնիսկ այդ վատ ժամանակաշրջանում մի շարք տիտաններ հասցրեցին հանճարեղ գործեր ստեղծել ու մի ողջ ժողովուրդ դաստիարակել։ 

Այդ տիտաններից մեկը Եղիշե Չարենցն էր, ով մինչ օրս մնում է ոչ լիարժեք բացահայտված ու մատուցված։ Անգամ հիմա, երբ կարմիր դարաշրջանից անցել է մոտավորապես 100 տարի, դեռ պարզ չէ, թե ուր է թաղված Չարենցը, ով սպանեց նրան ու ինչպես։ Այս բացերը պիտի լրացնեն ներկայի ու ապագայի սերունդները։

NEWSPRESS.am-ը զրուցել է Եղիշե Չարենցի տուն-թանգարանի տնօրեն Անահիտ Ասատրյանի հետ, ով ներկայացրեց մի շարք նորություններ՝ կապված Չարենցի հետ։

«Մենք արխիվային նյութեր քիչ ունենք և հիմնականում դրանք պատճեններն են: Դրա փոխարեն, սակայն, ունենք գիտական ուսումնասիրությունների սեկտոր։ Մենք շարունակում ենք ուսումնասիրություններ անել։ Սպասում ենք արխիվային նոր նյութերի Չարենցի հետ կապված, որոնք մինչ տարեվերջ, հուսով եմ, մեզ մոտ կլինեն, սակայն չեմ կարող ասել, թե որտեղից և ումից ենք ստանալու։ Չարենցի ազգականներից գտել ենք նոր լուսանկարներ, ինչպես նաև լուսանկարներ Չարենցի երկրորդ կնոջ՝ Իզաբելայի հետ կապված։ Նախորդ տարի մենք ստացանք Իզաբելայի օրագրերը, նամակները, որոնք ավելի շատ զգացմունքային նամակներ էին։

Մենք վերջերս նամակ գրեցինք Արդարադատության նախարարությանը ու գտանք Չարենցի ու իր կնոջ՝ Իզաբելայի ամուսնական գրանցումը, որ կատարված էր մատյանի մեջ։ Իզաբելայի գերեզմանի մասին գիտեինք, որ կա։ Անցյալ տարի գնացինք, Սովետաշենի գերեզմանատանը գտանք։ Պահպանվում են գերեզմանաքարը ու վրայի գրությունները։ Ցավոք, մենք չկարողացանք պահպանել Չարենցի առաջին կնոջ՝ Արփենիկի գերեզմանը։ Այդ գերեզմանից պահպանվել է միայն դագաղի բռնակը, որ պահվում է թանգարանում»։

Անահիտ Ասատրյանն ընդգծեց, որ առաջիկայում տուն-թանգարանն ամեն ինչ կանի, որ նմանատիպ գիտական աշխատանքներին օգնության ձեռք մեկնի նաև պետությունը։